家族榮耀︳曾與吳卓羲火辣嬉水 再婚梁靖琪轉型做製作人好媽媽

《家族榮耀》入面，馬家細女昭慈因為係二奶女，成日被忽略，但係劇情開始有更多篇幅關於佢，更成為拯救馬家關鍵人物。飾演呢個角色嘅梁靖琪(Toby)，係劇組之中另一位「久休復出」嘅演員，原來佢2016年已經約滿TVB，而家會跟爸爸梁家樹參與製作人工作，仲做埋媽媽。

理論上，梁靖琪算係COLLAR大大師姐，因為2004年佢同廖雋嘉（Elise）、陳美詩（Macy）及張曼伶（Bella）組成四人組合「女生宿舍」出道，正正係由李澤楷旗下嘅唱片公司管理。不過女生宿舍只有2年壽命，Toby後來順理成章加入TVB，皆因阿爸係大台戲劇部製作總監，媽咪蕭笑鳴就係藝員部經理。聽落贏在起跑線，但Toby多年來都未做過女一，佢喺訪問提過，有時會諗父母唔係高層的話，喺TVB會唔會過得更容易。

不過更大難關未必係家境所賜，Toby 29歲就同圈外富商男友黃敏豪閃婚，但維持唔夠2年就分開。身為人妻嘅Toby 被傳媒影到去三亞拍《衝上雲霄2》外景時，與一眾男演員深夜喺泳池狂歡，更加同吳卓羲舉止親密，有傳呢件事就係離婚導火線。

2019年梁靖琪同年輕8年嘅圈外男友施雋賢（Jonathan）再婚，婚後未夠2個月就傳出有喜，同年12月誕下兒子，而家Toby正係陀緊第2胎。以往俾人印象貪玩嘅Toby，而家成日喺IG分享家庭照，似乎定性唔少。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！