容祖兒老豆容錦輝被爆做中港商務車隊長多年 開抖音帳戶分享司機見聞

樂壇天后容祖兒出道多年來，其家庭背景曾成為傳媒話題之一。最近有網民指，祖兒爸爸容錦輝喺內地社交平台抖音開帳戶，並以「粵港澳跨境商務車隊長」作介紹，分享工作點滴。

疑似容錦輝去年8月開始喺抖音活動，帳戶內容多數係介紹接送服務，例如暑假時有條片係話接受過3個家庭往返香港迪士尼。而喺一條自我介紹嘅片中話自己叫Michael，已經做咗中港澳客運超過16年，佢地嘅車隊有超過100架商務用七人車。輝哥話係2008年入行，當時有個內地朋友叫佢接送落嚟香港，途中嗰位朋友好多嘢問，佢地傾咗好耐，於是諗到可以做呢份工作，介紹香港之餘又可以吸收內地資訊。喺另一條片中，輝哥透露自己1985年已經喺東莞做製衣，熟悉內地情況，呢個講法同傳媒多年指容錦輝早已移居內地嘅資料不謀而合。

祖兒童年時住過蝴蝶谷木屋區，自細同媽媽余金鳳及細佬容逸恆相依為命，近年細佬做爸爸，祖兒「升呢」做姑媽仲會接姪女放學。祖兒父母離異多年，生父容錦輝曾被報導指負債未還，甚至令債主喺祖兒屋企附近貼街招追數，後來喺祖兒嘅公司協助下，容父簽下文件承認曾向女兒攞錢，亦承諾以後唔再打搞個女。而容錦輝及其母、即祖兒嫲嫲更曾惹上官非。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！