鋪路考AO?TVB黃文意原來係十億太子女 港大碩士加超cup身材贏晒

·2 分鐘文章

舊年喺TVB劇《寶寶大過天》飾演吳業坤老婆嘅黃文意(Mandy),劇中同老公吳業坤成日嗌交互寸推搪湊仔責任,令觀眾眼前一亮。今日有報導話Mandy參加政府舉辨嘅藝術行政見習計劃,佢亦承認投考過政務主任,唔通有意步《東張西望》前主持黃穎君後塵,由TVB轉行做政府工?

以往都係做閒角嘅Mandy,原來有身材仲有家財,學歷仲相當高,難怪挑戰考AO!

29歲嘅Mandy家境唔錯,父親黃裕發喺內地經營LED燈業務,公司市值據講有10億!童星出身嘅Mandy細個拍過《天地豪情》同《陀槍師姐》等劇集,後來9歲就去英國讀書,中學回流返港,再考入中大讀文化研究。畢業後Mandy再報讀港大碩士課程。

黃文意5年前大學畢業後就簽TVB,起初主要做娛樂新聞主播,同埋拍旅遊節目《3日2夜》,唔多唔少因為呢個節目嘅女主持都會有浸溫泉去海灘嘅場面,咁梗係要搵個身材好嘅主持益觀眾啦。之後被安排拍劇集但多數係跑龍套,近年稍為有印象嘅係《金宵大廈》第一個單元演part time girfriend,今次《寶寶大過天》演港女老婆入型入格,應該可以擺脫花瓶形象。

感情生活方面,最多人記得可能係黃文意同年長23年嘅唐文龍傳過緋聞。2018年時,有傳返TVB拍劇嘅唐文龍喺電視城遇到黃文意,主動「抄牌」結識,加上黃文意同唐文龍喜好嘅「白淨、身材好、後生」條件完全吻合,於是主動力追並成功到手,仲喺IG po一齊去昂坪睇大佛嘅相,但係戀情幾個月就玩完。後來有報導話係女方借戀聞上位,唐文龍就否認佢地交往過,成件事好迷離。

另外亦有報導提到Mandy同TVB奀星李日昇拍過拖,男方承認佢地分咗手,但係女方就冇正式承認過。而黃文意曾經post過唔少同前香港足球甲組聯賽球員馬歷治(Ivan Maric)嘅蜜照,亦公開承認同馬歷治拍拖,不過據知去年初疫情之下香港足球賽事暫停,馬歷治決定返歐洲搵食,未知佢同Mandy係咪依然一齊。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能