專訪劍擊「老虎仔」吳諾弘｜打劍食腦比身高重要、現放眼巴黎奧運：3年後我哋再嚟過！

你我或許不熟悉劍擊玩法，但經歷東京奧運，目睹過港隊劍擊代表的風釆，大概都對劍擊感到一絲絲興趣。尤其當看到以往在熒幕亮相的童星吳諾弘（Lawrence），轉眼變成拼勁十足的小伙子英姿出賽，份外親切。被指是港隊劍擊「秘密武器」，甫加入港隊就能出征奧運，這位熱血又自信的「老虎仔」話：「我知自己已經準備好！」

▲圖：香港體育學院

小學時，Lawrence 身邊不少同學都參加劍擊班，受同儕影響，加上他覺得劍擊服很有型，所以就報名試玩，結果深深愛上。學了沒多久，Lawrence 就立志要參加奧運劍擊項目。「很記得小時候教練問我，想去迪士尼抑或練劍，我係揀去練劍。」人仔細細就認清目標，非常難得！

Source: https://www.instagram.com/p/CGU3FMHBLhX/

Lawrence 讀畢中五後放棄升學，轉投全職運動員的懷抱，全賴家人的支持：「想做全職運動員不是一時三刻的決定，自己係好堅定，加上家人十分支持，咁都無嘢驚啦！」東京奧運一役後回到家，Lawrence 也感受到家人滿滿的愛：「一家人一齊食餐飯，好多嘢唔洗講出口就明，係Daddy 感性少少，一見到我就攬住我，我覺得好窩心。」

奧運表現對得住自己 吳諾弘：「3年後我哋再嚟過！」

以21歲之齡首次參加奧運就有機會上場對戰，有人認為吳諾弘非常幸運。然而Lawrence 相信自己靠實力才走到這一步：「最記得教練講：『你喺度唔係一個巧合，而係自己爭取返嚟。』呢句話好鼓勵到我，而且我知自己已經準備好！」

▲圖：吳諾弘

對於當日場上落力表現惜最終落敗，Lawrence 稱對得住自己：「我一直同自己講：『唔可以俾自己後悔』。呢句話背後意思係，我一定要做到想做的事。但如果這樣想，我會好有壓力，所以換個說法。今次比賽我完成到自己的目標，已覺得無悔。」 東奧搏盡無悔，他亦已放眼下屆奧運：「3年後我哋再嚟過！」

▲圖：香港體育學院

在奧運男子花劍團體賽一役中，吳諾弘一度連追7分，表現亮眼，得到全港市民大讚，封他為「老虎仔」，他本人也很愛這稱號：「（賽後）啲人叫我『老虎仔』係幾得意嘅！好幸運大部分評語都好正面，而每一個留言對我嚟講好重要，咁多個留言加埋，令我更感受到香港人嘅支持，令我有更大動力爭取好成績。」

吳諾弘賽後自我獎勵 手臂紋奧環五環：「我都有猶豫過！」

Source: https://www.instagram.com/p/CShC52fpy-3/

吳諾弘賽後返港隔離期滿，第一件事便是去紋身。他在手臂內側紋上約4-5cm大的奧環五環，當作是紀念自己出征奧運的禮物：「參加奧運前已經想紋，當時無做係因為怕一件事，萬一最終無機會上場，我便不算參加過奧運，所以想在完賽後，視乎表現再決定。」結果，他夢想成真了！

另一個獎勵方法，便是入手奧運紀念品。他形容跟隊友們走入紀念品店時都瘋狂了：「人人都執到一袋二袋，以為好平，完全無睇價錢。結果去到收銀處，個個拎住張收據都變晒樣，但無理由咁樣衰見到個價錢先話唔買。」最終Lawrence 買下一大堆奧運限定Tee、毛巾、擺設回家，至於花了多少錢，他死不肯說，看來是筆「巨額消費」呢。

幸好最終獲得約15萬比賽獎金，可彌補他的不理性開支之餘，也可好好犒勞自己：「我打算拎一部分獎金去換車，剩低嘅儲起去。」

▲要數最有意義的奧運手信，Lawrence 分享這條掛頸帶，上面扣滿與其他國家選手交換的奧運徽章，成為今屆奧運最值得留念的紀念品。

▲圖：香港體育學院

吳諾弘拍住師兄隊友張小倫、張家朗、蔡俊彥，或者與外國選手對戰時，顯得特別小個子，難怪網民好奇他的身高。他也忍不住在IG Live 為自己平反，指自己也有175cm 高，在香港男生中算是標準高度，然而在劍擊場上，總讓人覺得處於下風。

不過，Lawrence 認為劍擊取分主要靠「食腦」而非身高：「喺我角度係要諗點樣彌補身高呢個缺點，而辦法多的是。我自小欣賞兩位來自法國和日本的劍手，身高上都不算高，但出劍快狠準，所以我也會集中以速度取勝。同時，比賽時個腦要不停轉，諗吓用咩戰術，呢樣嘢比身高更重要。」在奧運男子花劍團體賽一役上，我們都看到了雄心壯志的Lawrence 如何秒殺對手，印證了他的策略是對的！

吳諾弘評師兄角色及定位 相差15歲零代溝！

打劍擊團體賽四位一體，火花、溝通、默契至為重要。看過Lawrence 與師兄張小倫、張家朗、蔡俊彥一齊開Live 分享，四個大男孩打成一片，他自己都話「無乜代溝」。四人私下定位又是怎樣？Lawrence 笑說：「我自己比較貪玩、搞搞震，鍾意整蠱做怪，帶歡樂俾大家；大師兄小倫無咩架子，似一個大哥哥，對我嚟講可能似一個叔叔。」話未完他又快速改口：「講笑講笑，係大哥哥啦！」 盡顯貪玩個性，希望大師兄看到這篇專訪不會怪他吧！

Source: https://www.instagram.com/p/BKiPcNRB-0d/

至於張家朗，Lawrence 話兩人從小認識，當時已經當他是偶像：「初認識佢時已經覺得佢好勁，係一個好近距離、觸得及的偶像。」而蔡俊彥則可以說是Lawrence 的soulmate：「Ryan係一個幾好嘅傾訴對象，我們有很多男士心事都會私下傾，聽吓佢嘅意見。」至於兩個大男孩有什麼男人心底話，大家不妨等下一次IG Live 旁敲側擊！

每星期受訓25小時 吳諾弘：「無可能chur盡自己！」

Source：https://www.instagram.com/p/CQLnLTqFUln/

當你以為練劍就是長期揸住把劍不停練？Lawrence 拆解受訓過程：「我們會有體能訓練，會分為力量（做gym）及專項兩種。例如專項上，針對步法，會訓練腿部用力；針對出劍，會訓練手部力量，形式非常多元。不過休息好重要，唔可以chur盡自己！」他透露偶爾還會出現男、女劍擊手一同練習的情景：「不過這情況不多，始終男女力量不同。」

香港剛誕生了奧運劍擊金牌得主，張家朗自然是個絕佳的練習對象。問到Lawrence 喜歡跟誰練劍，他則話：「我唔鍾意打死一個（隊友），因為好快會無新鮮感。所有隊友都有實力保證，就算係喺台下睇住佢哋打，都會有所得著。」

吳諾弘以運動員精神 勉勵香港人：「如果可以堅持，就盡力堅持下去。」

Source: https://www.instagram.com/p/CRzNWspsdNq/

運動員總會經歷高低起迭，時而受傷患困擾，時而因落敗而鬱鬱寡歡。統統都經歷過的Lawrence 則表示自己從未放棄：「唔係每個人都可以咁容易面對自己的失敗，但運動員精神係 “Never Give Up”，你會遇到好多唔同挫折，會面對輸，但唔好放棄。」不止運動員，你和我亦如是，在如今社會氣氛低迷的狀態下，Lawrence 勉勵香港人在不如意時：「如果可以堅持，就盡力堅持下去。」

推薦閱讀:

➤ 東京殘奧｜「輪椅劍后」余翠怡第5次為港出戰 曾奪奧運7金戰績遠勝張家朗

➤ 東京殘奧｜哪怕輸在起跑線，都能贏在終點！盤點5位殘奧運動員故事

➤ 為比賽5個月減40磅？前港隊劍擊選手張雪麗15年後重上擂台：從沒想過放棄！

Follow us on:

• Facebook: CosmoHK

• Instagram: @cosmopolitan_hk

• YouTube: CosmopolitanHK