專訪｜《從今以後》探討同志伴侶權益 導演楊曜愷：就算不能改變法律 也可改變思想｜Yahoo

【Yahoo 新聞報道】《從今以後》在柏林影展勇奪被視為同志電影最高榮譽的「泰迪熊獎」，更是罕有為香港國際電影節打頭陣的同志電影。電影從一對相守多年的女同志說起，帶出爭產的家庭衝突，亦讓觀眾直面同性伴侶權益問題。導演楊曜愷接受《Yahoo 新聞》訪問時指，電影故事由多個真實同志個案的經歷集結而成。在現實世界，不少個案於伴侶離世後，因家產問題與對方家人反目成仇，有人被迫搬離愛巢，望由電影探討「家」和「家人」的定義。

文字記者：盧珮瑤
攝影記者：Oscar Liu

5 年前，楊曜愷執導的《叔．叔》，探討了年長男同志的議題。如今新作《從今以後》，則以一對年長女同志為主角。

上映逾一周，於其中一場謝票場，有觀眾向楊曜愷說：「套戲都唔係講女同志嘅！」楊在訪問時重提笑道，「成齣戲唔係講兩個女人 fall in love（墜入愛河），可能佢係想睇《嬸嬸》、即係《叔．叔》version two（第二版）」。

「係唔係有血緣嘅人先最親密呢？」

《從》由年長女同志關係切入，講述 Pat（李琳琳 飾）和 Angie（區嘉雯 飾）相守逾 40 年，Pat 於睡夢中猝死，獨遺 Angie 面對 Pat 的家人，卻因後事安排、遺產處理等問題分歧處處。在家庭角力之中，探討何謂「家」和「家人」，「係唔係有血緣嘅人先最親密呢？定係同你一齊咗好耐嘅人先係最重要呢？」

《從》的故事靈感，來自楊曜愷參加的一場同志遺產權益講座。講者提及 3 個女同志個案，3 位當事人的伴侶離世後，因種種紛爭而與伴侶的家人日漸疏離。楊隨即相約她們做訪談，「我覺得佢哋嘅 case（個案）可以帶出好多嘢，可以講香港嘅 LGBTQ rights（同志權益）、同性婚姻，亦都可以講吓咩叫家人」。嶺南大學文化研究系副教授鄧芝珊專門從事女同志研究，她向楊轉介更多相關個案，鄧亦成為《從》的聯合監製。

同志被禁出席伴侶喪禮 免影響家產分配

楊的訪談個案中包括男女同志，以女同志為主：有人被對方家人禁止出席喪禮，為免「未亡人」身份會影響家產分配；有家屬對資產虎視眈眈，「（伴侶）走咗第二日（家屬）就會問『佢唔係有好多名錶嘅？我想佢出殯嗰日帶啲靚啲嘅錶』，就即刻去咗拎；或者問佢啲酒喺邊，想拎去格價」。愛巢更被鵲巢鳩佔，「有啲個案（家人）係直頭搬入去住，一開始用好多藉口成日上去坐，之後出完街返屋企佢哋又喺度，結果佢（當事人）頂唔順要搬走」。

現實個案故事充滿角力，楊卻不願劇本走向二元對立。戲中 Pat 的家庭有眾多面向，胞兄（太保 飾）對妹妹離世的情感掙扎、姪女 Fanny （廖子妤 飾） 和姪兒 Victor （梁仲恆 飾）的經濟壓力等均成分歧的誘因，「我唔想講佢（Angie）點樣畀佢哋虐待，咁樣個故事好快會變《溏心風暴》，一個好人一個奸人，你一定唔identify（認同）奸嗰個」。他將觀眾置於兩難的局面，提供反思空間，「而家會令觀眾覺得，大家都有難處，都需要嗰層樓，而其實我又知道呢個女人應該住喺度，咁我應該點揀呢？」

模糊之間 女同志較易「融入家中」

《從》被視為《叔．叔》續集，兩部電影同樣以年長同志為主題。楊並非刻意著墨年長同志群體，只源於角色設定的需要，「佢哋應該要 build history together（一起有過歷史），亦都要同對方家人有一段時間關係，變咗（角色）唔可以係 30 幾、40 歲」；以往男同志大多不被家屬接受，反觀女同志較能「融入家中」，變相與雙方家人關係較佳，「兩個女人佢哋會覺得『你哋都嫁唔出，做 roommate（室友）、姊妹、老友啫』，好多時佢哋嘅關係都喺模糊之間，但某程度上大家又 treat（視）佢哋為一對，當咗係一家人，點知有一個一走咗之後，原來佢哋唔係咁樣睇你」。

除女主角外，楊對一眾男角亦有仔細考量。戲中有一幕，Pat 的胞兄拜祭後獨站角落哭泣，隨後左右張望、抹乾眼淚才離開，「某程度上係想反映喺父權社會入面，男性都係受害者，父權入面你要好成功、你永遠唔會喊、唔會有弱點」。戲中三個男角均面對養家、成家立室的經濟壓力，「佢哋 3 個都係『唔成功』嘅男人，一個係娶老婆都無本事，或者娶完老婆要屈喺好細嘅地方，日日畀老婆埋怨」。

為香港電影節打頭陣：係好大嘅 step forward

《從》的故事以反思「家」為主軸，也揭示同性伴侶權益和婚姻平權的重要性。資深電影人爾冬陞近日多次指出，電影不能改變社會，只能提出問題。《從》是否有改變社會的想法？

「所謂『改變社會』係點樣改變呢？可能你唔可以即刻將法律改變，但我覺得你可以改變到人嘅思想，令到人起碼由完全不聞不問，到知道佢哋原來要經歷呢啲嘢、有咁嘅問題，都係好重要嘅第一步。」楊曜愷說。

《從》被選為「第 48 屆香港國際電影節」的開幕電影，已是改變的萌芽，「呢個係一個好大嘅 step forward（邁進一步），唔會話因為講呢個（同志）議題而唔將佢擺做 opening film（開幕電影），其實係 embrace（擁抱）咗呢齣戲，話畀觀眾知『你唔好用有色眼鏡去睇呀』」。

電影一步步推動思想變革，平權終需在社會結構入手。楊對此感到樂觀，以近日多宗司法覆核案為例，前民陣召集人岑子杰的海外同性婚姻司法覆核案，去年 9 月終審法院裁定岑部分勝訴，給予政府兩年時間確立同性伴侶關係法律框架，「法庭全部都係 on the side of LGBT（支持LGBT），全部都係講緊你唔做就好 discrimination（歧視），政府自己有無 proactive（主動）去做就當然無，但而家佢一定要做」。他認為，即使同志運動在街頭絕跡，法庭將成平權的新路向，「當然永遠係唔夠快，但都係要進行」。