專頁刪「敏感」內容被問是否「驚」 謝偉俊：僅預防工作

【本文獲 獨立媒體 授權轉載】

【獨媒報導】立法會議員謝偉俊早前關閉社交網站專頁，以審視及刪除「敏感」內容，過去周六重開並發聲明稱，所有批評旨在提出問題及改善意見，或循合法途徑倡議制定政策。謝偉俊今早接受商台節目《在晴朗的一天出發》訪問，主持陳志雲問他：「你驚呀？你驚乜嘢呀？點解會咁做嘅？」謝偉俊就稱「其實唔可以用個驚字」，作為律師每逢有新法例，都會檢視個人、公司及機構所作的事會否有影響：「預防嘅工作咁解啫。」

「西環契仔」遭李家超批挑撥矛盾 專頁23條立法後四日下架

曾被視為「西環契仔」的謝偉俊，今年1月25日在立法會答問大會向行政長官李家超發問，質疑近日庫房「水緊」，執法人員日夜繽紛「贈慶」，例如抄牌、便衣警察捉拿沒有遵守規則過馬路的市民，重罰食肆阻街或全天候「車輪戰」打擊書店、工廈食堂的高壓執法行為。

謝偉俊又認為，當局施政作風更是「親小紅書無納稅嘅帳戶，遠真正納稅嘅香港人」，官民矛盾的氣氛令社會繃緊沉重，難以投入盛事，加上官員解說理虧卻諉過於民的垃圾徵費，問當局會否檢討被指濫罰搶錢的高壓政策。李家超回應時強調，反對挑撥矛盾的說法，斥責對方的用詞令他想起2019年「黑暴」的「軟對抗」及「反動力量」。

本身是律師的謝偉俊，他在《維護國家安全條例》刊憲生效四日後，將 Facebook 專頁關閉，至前日重新上架，並列明內容僅供保存工作紀錄及參考，所有批評旨在提出問題及改善意見，或循合法途徑倡議中央或特區政府制定政策。

陳志雲問：你驚呀？ 謝偉俊強調議員應具批判性

在節目中，被問到此舉是否與答問大會有關，謝偉俊稱「其實唔係」，兩者的角色與身份不同，「有啲可能要主向思維」，而議員的責任是有批判性，只是做議員應做的事：「用返特首嘅講法，我哋 red team 嚟㗎嘛，如果個個都講同一個方向，政府就好危險。」

談到該段免責聲明內容，謝偉俊承認「為做而做」：「亦都好過唔做，因為有時有啲人⋯⋯覺得某啲帖文啱佢心水，周圍去發嘅話，事實上累親自己又累親人。」

審視專頁歷年帖文 指犯法無關背景

至於23條立法對本港市民的影響，謝偉俊稱絕大部份市民都不會干犯叛國、分裂國家及洩露國家機密，但不排除有市民，在社交平台比較容易「犯咗事而唔覺得犯事」：「以往比較寬鬆嘅社交媒體介面，於是留返啲記錄喺度無清洗、無刪除咗佢。」他更舉例指早前一名在日留學的女學生，涉嫌在社交媒體上發佈具煽動意圖的言論，提醒市民要小心：「呢啲可能年青朋友，可能會一時衝動下，特別容易會留一啲語言，以前做落咗嘅，而唔知道23條立法之後，其實可能會係比較嚴重罪行。」

在節目中，謝偉俊更透露，助理已全天候審視專頁歷年來的帖文。主持問：「謝偉俊喎！點會貼一啲嘢違法呢？都要審視一次呢？」謝偉俊就表示：「就算特首都會有僭建啦。僭建風波出嚟之後，如果大家唔檢視一下自己屋企有無僭建，咁咪中招囉。以往有啲高官可能醉駕，又呢樣嗰樣，個個都會犯法㗎，其實唔一定話係邊個背景。」

避免遭激進人士「攞住內文驗屍咁驗」 稱幫返執法機關

謝偉俊表示，每人都有責任審視其現在、過往具持續性行為：「有無需要係再將風險減低佢，因為始終係有新例出咗嚟。」主持就關注：「你都有需要，就好多人都有需要。」謝偉俊重申，今次做法的原意是不欲帖文遭政見不同人士，尤其激進人士「攞住內文驗屍咁驗」：「然後（交）畀國安，（問）咁算唔算、係咪犯咗法，搞到好多尷尬。呢個幫自己，亦都幫返執法機關。」

主持問謝偉俊，此舉會否予人無事生非，將23條立法說成洪水猛獸。謝偉俊就說「擔心都無法子」，每人都應有其法律責任：「譬如宜家唔准用膠刀叉，我哋會唔會擺得太多膠刀叉喺鋪頭度，同事唔覺意派出去，我哋又犯法呢，我諗每個市民都應該有呢個責任。」

謝偉俊最後表示：「我諗我係或者比較少數嘅建制派，仲係有時會講一啲聲音係政府唔係咁啱聽。又或者甚至乎係唯一一位，特首喺個立法會，本來應該有晒豁免權利場合，都有個批評，對於我嚟講應更加小心。」