【專題】USB 頭多就好？ 6 款「4 腳拖板連 USB」幫你試

每個人屋企閒閒地都 2-3 個拖板，選購拖板除了留意插頭數目、有否防雷之外，近年仲會睇埋有冇 USB 充電接口，不過，暫時整合了 USB 的拖板仍未算主流，選擇比獨立 USB 拖板少，因此小編就買了市面數款「拖板連 USB」返來研究一下…

1.) aMagic MagStrip APS-S1440-UK

MagStrip 設計有別傳統拖板，外殼較流線形，4 個「插蘇」均設獨立開關及 LED 燈顯示狀態，旁邊有 4 個 USB 接口，總輸出為 4A，即插滿後每個頭平均有 1A 輸出。最後，此拖板不設掛牆設計，因此必須水平擺放。

市價：$238

▲ 背部不設任何掛牆設計。

▲ 備有 4 組 USB 中輸出為 4A。

2.) FYM S344USB

FYM 設計屬傳統「4 腳」拖板再加 USB 充電，4 個「插蘇」附獨立電源開關，背部不設掛牆凹位，但預留螺絲孔可固定在牆上。拖板尾部設 4 個 USB 接口，規格列明 2.6A 輸出共享，即 2 台裝置變成 1.3A； 4 台裝置就降至 0.65A。

市價：$175

▲ 4 個「插蘇」附獨立開關，而電線就有 1.5m 長。

▲ 沒有掛牆凹位，但可用螺絲固定在牆上。

▲ 4 個 USB 位於尾部，規格列明 USB 輸出為 5V / 2.6A 輸出。

3.) MEC RS-4USB

MEC 外殼平面方角，設計好似去返 80 年代，備有 4 個「插蘇」及獨立開關，機面預留螺絲空固定到牆上，電線亦相對較長。不過，它是測試拖板中唯一僅設 2 組 USB，總輸出只列明「2.1A Max」，並冇交代每個頭還是共享輸出。

市價：$138

▲ 預留螺絲孔可以固定到牆上。

▲ 提供 2 組 USB，但規格只列出 2.1A Max。

4.) Orico HPC-4A5U

Orico 是測試品中唯一使用並列設計的「4 腳」拖板，特色係較短身，但不設掛牆設計，而且電線亦相對較短。不過，它擁有最多 5 組 USB 接口，總輸出為 8A 並設 Super Charger 技術。

市價：$288

▲ 4 組插蘇使用並列設計 (2×2)，但電線亦相對較短。

▲ 機背並冇任何掛牆設計。

▲ 擁有最多 5 組 USB 接口，支援 8A 總輸出及 Super Charger 功能。

5.) WinStar RB-4USB

WinStar 都係傳統拖板設計，備有 4 個「插蘇」及獨立開關，機背預留凹位及螺絲孔方便掛牆。尾部設有 4 組 USB 接口，左邊 2 組屬 2.1A 共享，右邊 2 組屬 1A 共享，但兩邊都各有 1 個接口封上膠塞，唔知係咪代表唔用得呢？

市價：$148

▲ 預留掛牆及鑽牆設計。

▲ 擁有 4 組 USB，左邊為 2.2A 共享；右邊為 1A 共享，而當中 2 個頭都比膠塞封住。

6.) Xpower XP-XPS3AC-GY

Xpower 係評測拖板中唯一使用鋁製外殼，備有 3 個「插蘇」接頭，設統一電源開關，背部預留凹位可掛牆擺放。而 4 個 USB 設在拖板前方，規格列出 6A 總輸出，並設智能充電口及支援 2.4A 輸出。

市價：$298

▲ Xpower 唯一使用金屬外殼，但「插蘇」數目就只有 3 個。

▲ 背部預留掛牆孔。

▲附 4 組 USB 並支持 Smart Super Charger，總輸出為 6A。

Part 1. 規格對比

這次測試的 6 款拖板都係「四腳」為主（Xpower 除外），除了 Orico 及 Xpower 其他都設獨立電源開關（插蘇），當中只有 aMagic 及 Orico 不設任何掛牆設計，而 Orico 亦係咁多款中電線相對較短。USB 方面，除了 MEC 僅設 2 組，其他款式都有 4 組，而 Orico 更擁有最多 5 組，當然接口多唔一定充得快，正如 MEC 同 FYM 的 USB 總輸出只有 3A 以下，相反 Xpower 及 Orico 就分別有 6A 及 8A，係咁多款拖板中輸出最高。

▲註：紅字為缺點；藍字為優點

Part 2. 實試 USB 充電

好多人都以為這類拖板 USB 接口越多越好，但從 Part 1 看到拖板上的 USB 其實都有不同輸出規格，因此小編就為此進行充電測試，並量度拖板上 USB 的實際輸出。先講輸出規格最高的 Orico 及 Xpower，前者 5 組 USB 錄得 1.1A-1.47A；後者 4 組 USB 錄得 1.08-1.26A，兩者各組 USB 都有平均 1A 以上輸出，即插滿所有 USB 充電效率都不降。

▲ Orico 5 組 USB 平均輸出 4 組為 1A ，其中 1 組為 1.47A。

▲ Xpower 4組 USB 有 1 組錄得 1.26A，而另外 3 組就平均約 1.05A。

至於 aMagic 及 Winstar，前者 4 組 USB 錄得 0.9A-1.46A，充電效率冇問題，但輸出數值比列出規格高了 0.5A；後者 4 組 USB 錄得 0.35-1.35A，差距極大原因係 4 組 USB 實際係 2 組 2.4A 及 2 組 1A，當中 2.4A 2 組表現正常，但 1A 2 組僅錄得 4.75V / 0.27A-0.67A，數值完全不適合充電，藉此證明 USB 頭多並唔一定有用。

▲ aMagic 4 組 USB 輸出平均都有接近 1A。

▲ Winstar 4 組 USB 輸出差距甚大，其中 2 組電壓及輸出都嚴重偏低。

最後 2 款分別係 FYM 及 MEC，它們的 USB 輸出規格只有 3A 以下。前者 4 組 USB 錄得 0.5-1.01A，成績其實都唔太好，平均值低過 0.9A 其實充電都開始慢；後者 2 組 USB 就錄得 1.37-1.56A，成績比列明的 2A 超出接近 1A，雖然充電效率夠高，但大家還是睇埋 Part 3. 先。

▲ FYM 4 組 USB 只有 1 組錄得 1A，其他 3 組都只有 0.5A – 0.83A。

▲ MEC 僅列明 2A 輸出，但實際輸出可超額至 3A。

▲註：紅字為欠佳

Part 3. 熱量 噪音

畢竟拖板上的 USB 原理都係 USB 火牛，充電時都有可能會有危險。先講溫度，每款拖板充電約 5 分鐘小編都會量度 USB 部份外殼溫度，咁多款拖板中 Orico 及 Xpower 溫度最低只有 33 度以下，其餘拖板就錄得約 40 度，當中 MEC 及 Winstar 係最熱，有成 45 度以上，而兩者亦有另一共通點，就係充電時會產生電流聲，Winstar 情況屬輕微，而 MEC 就屬明顯，但其餘 4 款就冇任何電流聲問題。

▲註：紅字為欠佳

總結：千祈唔好貪平！

試完咁多款 USB 連拖板後，簡單總結係「千祈唔好貪平！」，拖慢充電時間都係其次，更重要係唔知會唔會有危險。不過，咁多款之中 Xpower 同 Orico 表現都算最理想，Xpower 可掛牆；Orico 「插蘇」及 USB 數目都較多，輸出又夠力，無論充多部手機甚至 Tablet 都應付得來。如果覺得 $300 個拖板太貴，次選仲有 aMagic 價錢平約 $50。

▲ 左為Orico HPC-4A5U 右為 Xpower XP-XPS3AC-GY。

不想錯過最新科技猛料及限時優惠 ? 請 Follow PC3 FB 專頁 www.facebook.com/pc3mag

相關文章

• 蛇叔：「終於唔洗再拖上拖！」- ORICO Home Power Center 拖板

• 蛇叔：「用料唔錯 長線抵用」- Innoz 2.4A Steel Mesh Cable