小一派位︳吳日言大女獲派第8志願 生完細仔3個月起程陪仔女去英國讀書

今日小一統一派位放榜，唔少家長緊張過自己當年會考放榜。早前生完細仔仲未坐完月嘅吳日言Yan，大女Bea今年升小一，Yan出post表示Bea獲派第8志願。聽落強差人意，但Yan就話流下開心眼淚，因為佢決定帶住3個仔女，今年8月去英國升學。

Yan向傳媒透露，本來都同其他家長一樣為Bea考小學做足準備，去多間學校面試前教佢點應對，Yan覺得好大壓力。加上Yan眼見囡囡K3開始功課倍增，升小一應該更不得了，到時督促功課點都傷感情；而且一旦入唔到心儀學校又要叩門，Yan自己都唔想，於是去年11月同老公Barry去英國探路，為仔女計劃升學PLAN B，點知喺旅途上Yan發現自己懷有第3胎。

計劃跟不上變化，不過Yan似乎一早計好數。派位未放榜時Yan喺訪問中提到，小學派位同抽獎一樣講運，Bea入唔到想入嘅學校的話，可能要轉去讀私校或者國際學校，計落開支同出國升學差唔多，更何況佢有3個。即使Bea入到好學校，但假如係女校，二仔Zayden同細仔就冇咗兄姊同校優先嘅分數。而Yan去完英國之後，相信佢同小朋友都適應到當地生活，但就預咗要一打三做全職媽媽。而老公Barry就會港英兩邊飛主力留喺香港幫Yan打理飲食生意。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！