小圓台音樂會｜張繼聰鐵漢柔情贏盡掌聲 梁釗峰遇上Mansonvibes台上扮咀嘴

由POPM製作、創作總監康家俊及音樂總監Patrick Lui雷柏熹主理，全新音樂會系列《小圓台音樂會》於昨晚舉行第一回演出，三位主角：張繼聰 、Mansonvibes 及梁釗峰回歸基本，以最純粹的音樂演出與樂迷交心，而三人亦因為今次合作而變得熟絡，釗峰更一度作狀咀Mansonvibes呢！

今次3位主角各自擁有他們的小圓台，率先登場的有硬朗的張繼聰，他在台上演唱時道：「今日我冇任何花巧嘢，只係將我最誠懇、最坦誠嘅一面，透過呢個舞台，同大家分享我一啲真正感受，因為呢個小圓台，就係希望大家可以好親密咁去交流，一齊去經歷呢個旅程。」阿聰挑選的歌單之中，除了早期的慢歌〈一手舞曲〉到近作〈日薄西山〉外，他亦演繹了太太謝安琪〈成婚破浪〉，而展現過他那鐵漢柔情一面後，曲風一轉〈末日先鋒〉、〈半江紅〉及〈David Harleyson〉接續登場，炸爆舞台的演出，將現場觀觀一一焫著。

接著登場的有感性的Mansonvibes，他挑選的歌曲都有特定對象，其中他唱出新作〈那讓我們一起〉時說道：「呢首歌送俾喺呢個當下，仍然選擇留喺呢個地方，同埋今（昨）晚選擇嚟到嘅你哋。」隨後他又分別與釗峰合唱其作品〈約克愛黑〉，在演繹阿聰的〈循環線〉時，他更獲阿聰為他結他伴奏。至於另一首別具心思去挑選的作品，就是陳奕迅〈葡萄成熟時〉，Mansonvibes揀選這首歌給自己以及他這個世代的男生，他解釋道：「細個讀書時，成日塞住耳仔聽歌，呢首就係成日會Loop嘅歌，相信嗰陣時都冇諗到會有機會唱歌俾你哋聽，同埋有人會願意塞住耳仔聽我唱歌，我想同嗰陣時嘅自己講，You are not alone, you are very romantic。」

最後出場的釗峰，他唱過大熱作〈至少還有你取暖〉後，便與Mansonvibes合唱對方的〈無可救藥的浪漫〉，全情投入音樂世界裡的釗峰，一口氣唱出〈愛情難以許可我們回到當初（1717）〉、〈佚名〉、〈已……（3235）〉等作品後，他挑選了阿聰作曲的陳奕迅歌曲〈防不勝防〉翻唱，全新的編曲，為作品帶來耳目一新的感覺。在台上，釗峰大喊：「好爽！小圓台係一個好好嘅圓形，令我諗起一個cycle，喺呢個cycle入面，就同大家談下情說下愛，但講愛，最終都會有得著。」然後他便送上代表對愛有所領悟的〈閃亮的青春〉及新作〈遺憾與遺憾的一切〉。

各人演出過後，三人各自在台上分享感言，其中釗峰對Mansonvibes：「我同你唔知點解好似幾Friend，好似識咗好多個世紀，今世再遇。」Mansonvibes聽到即上次擁抱，阿聰更示意二人不如咀嘴，釗峰也作狀交貨，場面搞笑。阿聰亦表示：「成晚聽住釗峰同Manson係好享受，你哋買唔到呢啲飛，因為我喺耳機聽。我喺歌手裡面熟於Come and Go，但你哋好Active，希望大家多啲支持樂壇，多啲支持兩位。」Mansonvibes也多謝阿聰為他彈結他，但心水清的阿聰則問他：「歌曲推出時你有冇兩歲？好快到你，第時有啲細個你嘅，你又幫佢彈結他，一代傳一代。 」

音樂會過後，阿聰分享感受道：「呢種表演模式係比較少有，冇乜舞台效果，真係音樂行先，我好享受，因為音樂性好高，講求水準，因為冇遮冇掩，好清楚一把聲，呈現我哋嘅感受。有啲Show要排舞，娛樂性大啲，但呢個音樂會回歸音樂性，觀眾亦很享受。」釗峰則道：「頭先氣氛似喺Band房，同樂手好近，眼神交流都好清楚，成件事其實好奢侈，但同時亦可以好集中，正！」Mansonvibes亦表示：「呢個組合有今生冇來世，尤其有啲歌改編後都超好聽，成個體驗獨一無二。」

身為創作總監的康家俊，亦表示今次《小圓台音樂會》可算是一個實驗，他說：「坊間各式形式嘅Show都好多，當中好多好精采嘅Creative，但想喺呢個城市入面做一啲喺同一時間裡面冇發生嘅嘢。既然大家做音樂，就不如好純粹地玩音樂。」今次合作，亦有別坊間既有模式，康家俊續道：「合作唔一定要手拖手，可以係好精神上、情感上嘅合作。今次合作，令到阿聰、Mansonvibes同釗峰交換各自心情，影響大家嘅睇法，然後為觀眾提供不一樣嘅演出，不一樣嘅選擇。希望大家唔好要求一模一樣嘅嘢，嘗試去接受唔同嘅狀況。」