尹光殺入叱咤我最喜愛的男歌手5強 鄭欣宜晉身5強力爭我最喜愛的女歌手3連霸

「叱咤樂壇流行榜頒獎典禮2023」由樂迷投選嘅我最喜愛的男、女歌手及組合大獎，本周展開第二輪投票，由各組別十強中選出5強。商台今午公布三個大獎呢輪投票嘅終極5強名單 －

喺網民力推之下，尹光一如所料殺入5強，有望打破近三年由姜濤及盧瀚霆2位MIRROR成員得獎嘅局面。而MIRROR成員當中，仲有陳卓賢殺入5強，另一位5強男歌手係張敬軒。至於近年人氣強勁嘅MC張天賦同林家謙爆冷5強不入。

女歌手方面，連續2年奪得我最喜愛的女歌手嘅鄭欣宜，即使大半年來處於休養狀態冇出新歌，仍能再次晉身5強，將與Gin Lee、Serrini、陳蕾及謝安琪角逐，力爭我最喜愛的女歌手3連霸。打入十強嘅炎明熹喺日前公布7強名單已經不見蹤影，結果亦未能再晉一級。

而組合5強當中，MIRROR同ERROR穩陣出線，2支女團COLLAR與Lolly Talk亦順利入圍，樂隊代表就只有Dear Jane。

我最喜愛的男、女歌手及組合大獎將於下周展開最後一輪投票，由五強選出今年嘅大獎得主。而之後進行嘅「我最喜愛的歌曲」大獎，相信尹光亦有機會力拼到5強階段。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！