山寨版周杰倫開演唱會 票價竟然越後越貴？網民：性價比高

出道多年嘅周杰倫，推出過唔少深入民心嘅經典神曲，深得樂迷愛戴，華語樂壇天王當之無愧。近日有位「山寨周杰倫」開「演唱會」，票價絕對係感動人心，獲網民大讚有性價比。

呢位「山寨周杰倫」自稱係歌手「黑倫」，不時喺內地社交平台抖音上載唱歌片段，最近更上載多條「演唱會」嘅短片與網民分享，黑倫有唔少開「演唱會」嘅經驗，喺影片中睇得出佢落力演出，無論造型定係動作都模仿得好似，獲得唔少樂迷支持令全場氣氛高漲。

另外，佢「演唱會」嘅票價定價都同其他歌手好唔同，最前排收費最平只需¥50，中間位置收費¥1500，而最後排就係¥2000，網民得知票價後都忍唔住爆笑兼踴躍留言「黑倫能不能全國巡演」、「有一刻他把自己當成周杰倫 那一刻我也當他是周杰倫」、「不是杰倫聽不起，而是黑倫更有性價比」、「最後一排最貴 因為越遠越像周杰倫」、「沒想到真的有人買門票去看」、「周杰倫的票時越近越貴，黑倫的票越遠越貴」、「期待香港站演唱會」、「A貨都咁high」及「山頂位最貴^^」等等。

其實除咗「山寨周杰倫」之外，內地仲有「山寨謝霆鋒」、「山寨周潤發」、「山寨林俊傑」及「山寨劉德華」等山寨明星因樣貌似某位明星而成名爆紅。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！