師妹來勢洶洶 同室操戈 MIRROR不敢怠慢:可以再做好啲

Edan(左起)、Ian、姜濤及Stanley笑言靠打機來練習球技。
Edan(左起)、Ian、姜濤及Stanley笑言靠打機來練習球技。

女團COLLAR來勢洶洶,新歌點擊破百萬速度更勝MIRROR,昨日MIRROR出席活動時認為有競爭才有進步,並承諾會做得更好。被爆有新居的姜濤稱只是租來放置物件,若將來成功置業會開心公布。

MIRROR成員姜濤、呂爵安(Edan)、陳卓賢(Ian)、邱士縉(Stanley)與ERROR成員郭嘉駿(193)及梁業(肥仔)等昨日現身ViuTV新劇《季前賽》記者會,故事跟籃球比賽有關,但疫情下籃球場被封,他們笑言靠打遊戲機來練習。近日姜濤被爆筲箕灣有新居,他稱只是租來放東西:「銅鑼灣屋企唔夠大,而且每逢節日嗰區就好多人,我係人多先會過筲箕灣住幾日,真係買咗樓會好開心同大家講。」提到他在網上拍片為病童小天瑜打氣,又發語音短訊給天瑜爸爸,善心獲網友激讚,他指若疫情好轉會跟公司商量到醫院探望:「睇佢哋想我做咩,我唔肯定佢係咪因為我嘅歌而有反應,但如果幫到佢,我會好開心。」

193想炒賣捱打

提到女團COLLAR人氣強勁,新歌兩日半便破百萬,問他們會否感到受威脅?Stanley表示戥對方開心:「有競爭先有進步,何況佢哋係我哋師妹。(鏡粉不滿公司將資源投放晒女團?)我哋係可以再做好啲,好似姜濤首新歌都喺社交網整咗個新版宣傳啦!(花姐成眾矢之的,話佢管理不善。)佢有百足但都冇咁多爪啦!」Edan亦指聽到大家意見,會努力求進。而MIRROR演唱會的藍光碟昨日推出即被炒貴逾倍,193及肥仔笑言要求他們送碟拿去炒,即被Edan打頭:「唔支持鼓勵去炒賣!如果需求好熱烈,會同公司反映再加印。」又要肥仔及193承諾不炒賣才肯送碟給他們。

同場的張繼聰與《全民造星IV》參賽者葛綽瑤(Yoyo)首次參演ViuTV劇集,阿聰稱跟MIRROR合作感榮幸,問到劇中會否需要騷肌?他大賣關子:「會係電視史上尺度最勁。(露股?)騷內臟,哈哈!」並形容為超多人運動。

193同肥仔眾目睽睽話炒碟,確係ERROR!
193同肥仔眾目睽睽話炒碟,確係ERROR!