張文慈拍片大讚內地生活方便又先進 狂數香港生活不便

亞姐出身嘅張文慈（Pinky），先後效力亞視及TVB，不過佢喺2021年選擇長駐內地發展，努力經營直播帶貨及出席商演活動。佢試過觀看人數只有幾百人，甚至有內地網民表示唔識佢，而佢亦試過直播期間爆喊及發文大呻辛苦，去到今年7月仲宣佈暫停直播帶貨，原因係身心透支，要休息一段時間。相隔兩個月後，張文慈選擇喺生日正日（9月30日）復出直播帶貨。同時Pinky亦有不時更新內地社交網站同網民互動，Keep住曝光率，好似最近佢就拍片大談內地同香港生活嘅分別，力數香港生活不便多宗罪。

近日返咗香港嘅張文慈，拍片大談內地同香港生活嘅分別，首先佢就話自己去到而家都未習慣，因為之前喺內地生活只需要帶一部手提電話、一支唇膏及一盒粉餅就可以出門口，不過而家每一次出街都要帶個大袋，因為要裝好多嘢。

張文慈就拎個銀包出嚟話：「而家喺香港買嘢都仲要用現金，例如茶餐廳、街市，記得要預備現金呀！」並話如果要買昂貴物品時就要用信用卡、搭交通工具要用八達通、及記得要帶充電寶，因為街喺冇得租借。

之後，張文慈抱怨香港好多餐廳會限時，及指外賣附加費太貴：「唔係呀嘛，送外賣附加費廿幾蚊？咁咪仲貴過我喺內地食一餐？ 」另外，張文慈亦大呻香港冇網購，用完嘅嘢要出街買。最後佢就大讚內地生活非常方便：「其實呢幾年喺內地生活呢，我真係已經深深融入咗廣州嘅生活習慣裏面，同埋真係感受到方便啦、繁榮啦、先進啦！」

影片出街後，唔少內地網民紛紛留言表示認同，例如「真實。上個星期剛去香港，真的很多都比不上內地了！」、「太落後了，我出門帶一部手機就行了」、「第一次去你香港，真的不習慣，全部被你講中，好不方便」、「以前會羨慕去香港，現在不會了。因為每次去香港真的不方便，在這邊一部手機走遍整個深圳」及「都係大陸好什麼都方便乜都唔使怕」等等。不過有香港網民就表示唔認同：「我諗你可能好耐冇返香港，公共交通工具可以用八達通，支付寶，信用卡。七十一便利店可借充電寶....等等等」、「香港有網購 少啲啫」、「香港冇網購，定係你唔識用？」及「現金有乜嘢唔好？現金才真實」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！