張明偉宣布離開《愛‧回家》劇組 原因係同校外唱《銀河修理員》有關？

張明偉（Aaryn）憑處境劇《愛回家之開心速遞》嘅角色補習天王George「佐治」成功入屋，不過佢日前喺社交網站宣布離開劇組，之後佢喺接受傳媒訪問時話「新官上任之後，以為會有好開始，結果…心灰意冷。我這種閒角，隨時都會突然消失。倒不如在觀眾心中留下好印象，有緣再會。」唔少網民都紛紛留言表示不捨。

張明偉加入《愛回家之開心速遞》劇中飾演嘅George一頭亂髮勁搶眼，佢除咗非常聰明及操得一口流利英語之外，仲好有生意頭腦，與熊心如（蘇韻姿飾）創辦天才聯盟補習社。至於感情方面，佢曾經暗戀熊心如，不過最令觀眾印象深刻嘅一定係佢同池子孝（阮政峰飾）大玩HeHe情。

有報道指張明偉喺8月中知道戲份被腰斬，而佢亦冇收到9月份嘅開工通告。傳媒向佢查詢時，佢就回覆話公司冇交代過佢被消失嘅原因，不過佢就估係同7月中為學生打氣有關。喺7月初，元朗信義中學嘅兩名中五學生，喺校內歌唱比賽表演Dear Jane嘅《銀河修理員》，校方指部分歌詞含政治意味，二人各記一個大過。

而張明偉就喺7月中到學校門外自彈自唱《銀河修理員》，打算關心及為學生打打氣。張明偉喺接受傳媒查詢時就話可能因為呢個原因觸動到藝員部嘅敏感神經，之後佢就唔使出席宣傳活動，更叫身邊同事unlike佢個PO，所以佢就預計下一步係令佢喺劇中消失，不過佢就話依家對佢已經唔重要。至於下年年中先滿約，佢就話平常心，只係想做好自己。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！