張繼聰被認錯做張敬軒 網民提議代軒公找泳衣數 呂爵安湊熱鬧：軒仔做咩唔剃鬚

張敬軒早年曾於叱咤樂壇頒獎典禮得獎時公開感謝張繼聰，表示：「大家可能唔知道，其實佢真係我表舅父嚟㗎」，又試過於拍片時講笑咁扮自己係張繼聰；雖然二人外貌上唔太似樣，但周秀娜曾於電影《女皇撞到正》煞科期間，口快快將拍檔張繼聰講咗做張敬軒，當時張繼聰更扮發脾氣走開。近日，張繼聰就於社交平台分享被一班後生仔認錯做張敬軒嘅經歷。

張繼聰於社交平台寫道：「今日行沙灘，迎面行過一班後生仔，佢哋嘅反應？當然係見到名星果隻啦，然後我老婆聽到班年輕人話：『嘩，張敬軒吖』 我ok吖，慣咗，森美大哥都係近排先冇再叫我軒仔」；佢續指班後生仔搵佢影相，好彩對方記得自己有份飾演飯戲攻心：「我仲諗住叫佢哋記得投我一票我最喜愛男歌手，好在佢哋話好鍾意睇飯戲攻心，不過當然都唔排除，佢哋以為飾演二佬嘅係軒仔」張繼聰Hashtag咗張敬軒，笑言：「放心，下次有人再認錯我，我唔會特登喺佢哋面前講粗口，仲可能會除衫咁佢哋就會話張敬軒真人好斯文同埋好大隻」，有網民就喺留言下分享與張繼聰沙灘嘅合照，張繼聰詢問對方：「你話，我係邊個」網民笑言：「係張繼聰」，Edan呂爵安又湊熱鬧留言：「軒仔做咩唔剃鬚」，亦有唔少網民笑指咁都會認錯：「點解會咁好笑，軒仔幾時先可以練到你咁大隻，可摸耳除來睇下」、「佢心諗乜軒仔曬到咁黑，去完非洲嚟」、「老婆係隔離都認錯」、「張敬軒秘密已婚，帶老婆去沙灘」、「年輕人：張敬軒同謝安琪密會」、「到底係唱櫻花樹下嗰個係張繼聰，定係做飯戲攻心嗰個係張敬軒？？」等等，又有網民提議由張繼聰幫張敬軒找數：「代軒公找埋條泳衣數」、「表舅父會唔會考慮幫阿表舅甥找咗條泳褲數」等等，張繼聰就回應指：「一人做事一人當」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！