張致恒自爆返新工派傳單兼送外賣 網民嘲：兩日後睇下發展成點

張致恒（Steven）同老婆雯雯（區燕雯）喺2019年奉子成婚，婚後佢哋生完一個又一個，較早前更迎來第四胎，四年抱四（張天寶、張天牧、張天朗及張天樂），認真厲害！作為「多仔公」嘅Steven係屋企嘅經濟支柱，不過近年佢冇一份工做得長，兩公婆不時大呻家中財務問題，搞到佢哋一家嘅經濟狀況一直備受網民關注。

近日，Steven喺IG分享自己喺尖沙嘴街頭為茶餐廳派傳單嘅開工照片，並寫話：「過嚟尖東食午餐。飲靚奶茶啦喂，我派緊傳單，一陣間返入廚房。」之後，佢再出IG Story打卡話：「今日做外賣仔。」去到噚晚，佢再喺IG Story出PO：「我想搵多份即pay嘅工作，大家有冇介紹？」Steven除咗一個人做兩個工作崗位之外，仲想搵多份工，都算係幾勤力呀！

有網民認為佢返工搵錢養家係好事，不過有唔少網民就話睇下佢做到幾耐，因為之前冇一份工做得長：「呢啲通常見光死」、「佢就係收工攞啲飯盒返屋企，賺埋食費」、「兩日後睇下發展成點」、「完成3個月試用期才再出來說話 有時行動比言語更有效果」、「佢做超過半年先算」、「就睇吓你仲有幾耐 加油啦」、「如果佢今次真係可以捱到半年或以上我就對佢刮目相看」及「做一陣就唔做架啦」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！