張致恒開Live分享結紮過程 自爆生第二胎時已考慮做手術 網民封「結紮KOL」

張致恒（Steven）同雯雯（區燕雯）喺2019年奉子成婚，婚後佢哋生完一個又一個，雖然二人屢次傳出離婚消息，不過早前迎來第四胎，兩夫妻四年抱四，認真厲害！早前Steven喺社交網站宣布將會進行結紮手術，引起外界熱烈討論。去到噚晚（20日），Steven喺IG開直播談及結紮一事及與網民交流。

喺直播中，Steven表示自己喺幾日前已經做咗結紮手術，並表示自己喺有第二胎嘅時候已經考慮結紮，不過當時未有鼓起勇氣去做手術，之後仲笑話估唔到自己能力咁強，可以再生多兩個小朋友。直至去到第四胎，佢就真係下定決心去做手術，而其中一個原因就係為咗老婆嘅身體健康著想，因為生四個小朋友真係好傷，所以佢覺得自己要做個負責任嘅男人，冇理由要老婆去做結紮手術，所以手術就由佢嚟做。之後佢就話如果將來想再要小朋友嘅話，佢會考慮領養一個女兒。

之後，有網民問佢係唔係喺家計會做手術，佢就話唔係喺家計會做手術，因為家計會好繁忙，排期至少要排半年，再加上佢搵嘅日間醫療中心價錢差唔多，佢仲驚如果等多半年嘅話，唔小心會累到老婆再懷孕。另外，佢仲分享手術過程，整個只需15分鐘，連麻醉藥及休息時間就差唔多一個鐘頭。

有網民表示結紮都有機會懷孕，Steven表示認同，因為紮咗都有0.05%機會中，並話如果結紮後都令到雯雯懷孕嘅話，佢就會去買六合彩。Steven被問到結紮後有冇同老婆行房，佢就話冇，因為老婆啱啱先生完第四胎冇幾耐。佢仲話醫生指頭20次要盡力排走晒啲貨，因為精子會殘留喺入面，所以頭三個月一定要做避孕措施。Steven更搞笑話自己有諗過去捐精，不過佢又擔心成街都係張致恒。

對於被問到經濟問題時，Steven表示而家嘅收入只係啱啱好，夠交租、買奶粉及食飯。佢話自己一直有做幕前幕後工作，不過工作比較少，所以佢講明自己好想拍戲。

最後Steven表示自己喺2019年出事後開始被人鬧，所以佢而家已經睇化咗，仲話最緊要大家開心，唔介意畀人叫「結紮KOL」及「離婚KOL」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！