影帝劉青雲化身「市民劉先生」進駐抖音 網民表明更喜歡郭藹明

近年內地社交平台興起，越來愈越北上發展嘅香港藝人，為咗可以增加曝光率及多啲機會同內地粉絲互動都會開通抖音帳戶，而最新就有影帝劉青雲。

現年59歲嘅劉青雲入行40年，參演過唔少經典劇集及電影，演繹各種高難度角色，先後憑《我要成名》、《竊聽風雲3》及《神探大戰》三度封帝，好演技有目共睹。至於感情方面劉青雲與郭藹明喺1998年結婚，婚後二人十分恩愛，絕對係娛樂圈嘅模範夫妻，佢哋生活向來貼地，不時被網民野生捕獲，更曾喺過年時到街市買餸，期間接受記者訪問，而字幕就打上「市民劉先生」。

劉青雲喺開通抖音帳戶後，第一條片就走親民貼地路線，以行街市買餸作為題材，影片最初有佢買餸嘅畫面之外，仲有佢自稱自己係市民劉先生，表示自己一個人去買餸，對買餸唔太熟悉，不過對玩抖音更唔熟悉，問網民可唔可以教佢。

影片上載至今一日，已經超過34萬個讚好，及超過2萬留言，非常受歡迎。唔少網民都留言表示歡迎佢加入抖音，例如「青雲大哥，小時候的偶像，看大時代長大的」、「歡迎來到抖音世界」、「必須關注」、「歡迎市民劉先生入駐抖音」及「歡迎 劉先生加入抖音啦......終於等到你」等等。不過唔少網民更加關心及表明更喜歡佢太太郭藹明：「你好 劉先生，很喜歡你...老婆郭藹明」、「就是這個男人，娶走了我最愛的郭藹明」、「我喜歡你老婆郭藹明」、「我要和你決鬥，為了郭藹明」、「人生贏家，郭藹明真的非常漂亮」、「郭藹明能來嗎」、「劉先生，我喜歡你老婆劉太太」、「很喜歡你的太太郭藹明，她拍的每一個電視劇都看了」及「喜歡劉青雲更喜歡郭藹明」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！