微辣再爆欺凌？前成員Cass發文「你地係咪要害死多個人」網民︰有嘢就爆啦

微辣前經理人阿晶7月輕生逝世震驚網路，由於阿晶生前透露受欺凌，唔少網民都認為微辣要對阿晶出事負責。微辣喺阿晶逝世後不久，已經宣布取消原定8月中舉行嘅十周年演出，到8月中更宣布專頁暫停更新。微辣旗下多名藝人如霍哥、豪Dee等亦宣布離開。

正當風波漸告平息之際，其中一位微辣前成員Cass（趙嘉晞）尋晚喺IG發限時動態，寫道「到底你地係咪要害死多個人先可以停」，令網友議論紛紛。由於Cass未有指名道姓，加上阿晶生前亦有出過類似嘅控訴文，網民懷疑Cass係咪受到同樣遭遇。亦有網民希望Cass 可以講清楚咩事，「『你地』係指邊個先？如果係指網民嘅，即係想將阿晶嘅死屈係網民害嘅？如果係指微辣嘅，唔該有嘢就爆啦」。

連登討論區喺阿晶逝世後就有人持續出post關注發展，有網友指Cass早前post一張旗袍相時，列出提供服裝嘅品牌IG帳戶。後來該品牌懷疑因網友不滿受攻擊，於是發聲明澄清無同微辣合作，未來亦唔會同前微辣所有相關人士合作。其後Cass喺限動出過幾張相，上面tag咗身上穿戴嘅國際級品牌，有網民解讀Cass 咁做係暗串網民。於是Cass 疑似受欺凌嘅文章，亦可以睇成係向網民另一次反擊。

此外，近期虛擬幣風波越演越烈，有網民發現阿晶舊愛加蔥，曾經為虛擬幣兌換平台Coingaroo拍片宣傳。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！