微辣阿晶逝世︳霍哥等多名微辣藝人疑與公司割席 贊助演出嘅健身室被揭同微辣有關連

微辣前經理人阿晶逝世震驚網路，由於阿晶生前透露受欺凌，加上曾為舊愛、微辣台柱加蔥有感情糾紛，唔少網民都認為微辣要對阿晶出事負責。關鍵人物加蔥尋晚開live宣布離開微辣，又解釋自己無迫阿晶墮胎，同阿晶分開後先至同而家嘅未婚妻儀仔發展。

屬於微辣旗下藝人嘅霍哥（霍俊邦），被網民發現IG個人檔案上，已刪走微辣嘅工作聯絡方法，令人估計佢係咪因為今次嘅事而同微辣切割。霍哥另外喺IG story發文表示「收到好多訊息／但現在著眼點不應在於我／死者為大 讓家屬先好好處理後事／我的事 容後再說／她對我的恩 我當然記得」，被網民稱讚霍哥有分寸。除咗霍哥之外，網民發現江流、Tina田娜、Amilia同Cass等微辣成員，都冇po微辣嘅工作聯絡方法。

旗下藝人之餘，合作品牌都明哲保身。有迷你倉首先宣布「停止與微辣旗下藝人阿丞的所有合作，並將廣告片全數下架」。而微辣原本8月舉行嘅10周年演出，贊助商之一嘅連鎖健身室都表示，暫停贊助及相關宣傳。不過有網民發現，連鎖健身室嘅同名澳門公司，董事之一同微辣其中一位創辦人李偉麟（Jacky）同名，質疑港澳兩邊嘅連鎖健身室，係咪本身有關連。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！