雅虎香港新聞 【香港字體】橫筆回勾喻逆境中反抗 「思緒重生體」設計師：為香港留隻字體
【Yahoo新聞・香港字體系列報道】思緒重生體設計師陳靖軒（Roy）之所以踏上造字之路，初衷是在時代洪流當中，保留充滿港味的繁體字。單是一抹橫筆，也埋藏著他的心思：開筆筆觸像鋼筆般堅韌，作結時有鋒利回勾，喻意在逆境中反抗。正如其網站所指，重生體象徵香港人的靈魂：「有力量、有稜角、不放棄」。
文字記者：盧珮瑤
攝影記者：H.H.
Roy是廣告設計出身，笑言對圖像設計的經驗是「零」，直至找到「黑白分明」的字體世界，「發現自己都好似有啲sense（觸覺），就試吓鑽研，唔係我揀去造字體，係字體選擇咗我」。2019年底，他辭去設計師全職工作，化身「思緒俠」，製同藝術字體月曆，「拎住成副身家、兩三萬就走去做」。市場反應不俗，惟他發現港產字體買少見少。於是，2020年中，思緒重生體正式誕生。
寄望香港「重生」：「好多嘢都沒落緊」
為字體命名已是一門藝術。取名「重生」，是Roy對香港的寄語，「香港好多嘢都沒落緊，一啲好香港嘅嘢，例如手雕麻雀、舞獅，以前我會覺得如果呢啲界別用重生體，就係幫佢哋重生。但其實我哋係喚醒緊其他行業，只要你有新嘢加入去，你都一樣可以重生」。
他參考了蒙納宋體及華康黑體，「筆觸最似宋體，例如有前勾；黑體就係橫筆同直筆嘅粗幼度好相近，老一輩見到會覺得有浸『舊味』」。與宋體、黑體相比，重生體最特別之處是蘊藏一股霸氣。每道橫豎勾、點撇捺之中，埋藏了不同心思。最為明顯的，是在所有橫筆作結的字體中，都有一下鋒利回勾，「希望香港人遇到事嘅時候要反抗」。
剛黑體也是Roy喜歡的字體之一，「我好admire佢嗰種多面向，有種玩味，但又可以好serious，你見到《試當真》嘅title會用剛黑，有時政府標語都會用，香港字體可以做到咁嘅level，畀到咁多人用」。他目前以綜藝市場為目標，「呢隻字張力好勁，希望可以做到電視、電影title，設計時加啲drop shadow（陰影）同stroke（描邊），就已經好正」。為加強綜藝感覺，他增加每個字體的外擴感，使字型盡佔更大面積，每個字的寫法也是獨一無二。
如果字型是一個人，思緒重生體像極穿著復古衣服的潮流大叔，帶點懷舊，卻絲毫沒有脫節之感。Roy說：「我哋希望做到一種fashion，無論係舊嘅（領域）又用到，新嘅都會用到」。他也希望港人能夠新舊交融，化解世代之爭，「老一輩同後生嘅矛盾，係咪唔可以和解呢？其實係想叫大家一齊搵返嗰種香港靈魂」。
成功眾籌台幣350萬 招年輕字體設計師
Roy今年3月初成功眾籌台幣350萬元，希望聘請更多年輕字體設計師加入，包含5,300隻字的重生體將於今年12月發貨；亦打算將不同字以NFT發售，「想試突破傳統界限，唔使一定做晒咁多個字先有收入，打破咗本身分銷嘅方法」。
Roy相信一般人平日未必很留意字體，卻是潛移默化的人文風景，「你永遠唔會知一隻字型會擺幾耐，可能有個好勁嘅brand（品牌）用咗，擺咗100年，你就為呢個地方留咗隻字體喺度，係默默地為呢個地方做緊嘢」。
與Yahoo新聞讀者分享：
【「思緒重生體」詳情】
