愛回家丨林鈺洧演初戀Cafe侍應 曾羨慕郭柏妍多劇拍

2022年香港小姐冠軍林鈺洧（Denice）曾預告將加盟TVB處境劇《愛．回家之開心速遞》劇組，而近日於《愛．回家》演員發布嘅照片中亦見林鈺洧蹤影，估計林鈺洧已開始拍攝，係繼2023年落選港姐郭珮文（Juliana）加盟後，第二位加入嘅新成員。據悉，林鈺洧將飾演接龍初戀Cafe侍應之一，角色設定為男仔頭形象。

林鈺洧參選港姐前曾於ViuTV節目《對號入座》大爆床史，之後又傳出多項負面新聞，包括欠下逾50萬卡數及出席富豪飯局，不過林鈺洧就澄清自己無債務要償還，並將港姐贏到嘅所有獎金捐到慈善機構，以及表示自己係經公司同意下出席慈善團體飯局。林鈺洧呢兩年參加唔少慈善活動，又參與《不可能任務2》與《咁你都唔識》等綜藝節目；林鈺洧曾與2020年香港小姐季軍郭柏妍出席活動時，直言羨慕對方多劇拍，自己都想嘗試拍劇，惟未獲安排工作，只好趁機學唱歌和胎拳道自我增值，又曾於接受《玲玲友情報》訪問時表示自己好恨演戲，不斷向經理人求角色，指任何角色都可以嘗試，做死屍或者行行企企都可以，但就想演奸角挑戰一下自己。

林鈺洧又於《玲玲友情報》提到自己嘅減肥史，坦言選美嗰陣出鏡前一日去焗桑，戒澱粉質，轉食雞胸、蛋白質食物、烚青菜，以及168斷食方法，連續3個月都係8點後唔再食嘢，加埋做運動成功減咗10至12公斤。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！