愛回家︳姜麗文Liza角色返菲律賓 惹觀眾猜測「離家」甚至離巢？

《愛‧回家之開心速遞》不時有演員出出入入，早前已傳出音樂人伍仲衡、歌手胡渭康等都會加入劇組，但係前晚由姜麗文飾演嘅Liza同劇中男友池子孝（阮政峰飾）做主角一集，就引起觀眾猜測係咪又有角色「離家」！

前晚劇情提到劇中嘅菲律賓家務助理Liza辭職，並返回菲律賓照顧父母，池子孝打算前赴菲律賓向她求婚。本來一切準備就緒，池子孝更已獲得老豆池富的首肯，點知竟然收到來自Liza手機嘅視像來電，目睹疑似Liza結婚畫面。池子孝因無法聯繫Liza相當失落，更在酒吧借酒消愁，飲醉嘅池子孝遇到賈名媛（邱芷微飾），陰差陽錯下二人共度一夜，結果反而被已回港嘅Liza見到，結果Liza不辭而別，池子孝傷心欲絕，但係成集Liza都係冇出過場。

呢種交代方式，似乎暗示姜麗文飾演嘅Liza會離開劇組，唔少觀眾都話如果係真的話就相當可惜。而姜麗文喺劇集播出後，上載多幅同阮政峰嘅合照到IG ，仲寫道No matter what… Liza and Darling, Forever ，似乎有所暗示！

姜麗文2019年開始加入《愛‧回家之開心速遞》劇組，演活菲律賓工人姐姐Liza一角，唔鹹唔淡嘅廣東話更加似足現實中嘅姐姐，令入行多年嘅姜麗文成功入屋，更在《萬千星輝頒獎典禮2021》奪得「飛躍進步女藝員」獎。近年姜麗文嘗試到美國發展，Liza已經好少出現喺《愛‧回家之開心速遞》，連帶姜麗文都少咗喺TVB出現。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！