愛回家｜「書蟲」林浩文兼職揸的士 為搵錢去到盡連續揸21小時「特更」

藝人林浩文於TVB處境劇《愛·回家之開心速遞》飾演「書蟲」一角，亦係佢入行後較多人有印象嘅角色；去年佢就自爆趁空檔時間考咗個的士牌兼職做的士司機，表示男人始終要搵多啲錢，又指拍劇永遠係佢首選，希望演藝事業可以一直做到老，但可以喺未有劇拍嘅時候做下兼職，又希望透過揸的士去睇人生百態。林浩文當時透露自己每朝5點開工至下午5點放工，清晨4點天未光就起身去攞車。談到做的士司機趣事，林浩文表示有乘客認得佢，佢就直言如果認得佢的話，希望大家上車就同佢講句，並可以一齊討論《愛·回家之開心速遞》劇情。

近日，林浩文表示幕前工作排到5月，但想趁後生及放假搵多啲錢，於是租咗全日的士嚟揸，唔想浪費租車錢所以嘗試揸「特更」，連續21小時揸車，差唔多揸足一日，不過為保障自己和乘客安全，間中都會偷時間休息，又指揸完「特更」嘅第二日下午開工嗰陣頭暈暈所以都係無下次。

現年32歲嘅林浩文以舞蹈員出身，15歲開始跳街舞，擅長HipHop，BreakDance及社交舞等，佢喺2008年無綫節目中曾為郭富城伴舞，之後又於2017年入讀第29期無綫電視藝員訓練班，之後開始參與唔少劇集拍攝，不過飾演閒角居多，最為人熟悉嘅就一定係《愛·回家之開心速遞》書蟲一角。另外，TVB喺2021年拍攝真人騷節目《盛·舞者》，林浩文都係參加者之一。至於待播劇方面，林浩文於《非常檢控觀》中飾演游嘉欣哥哥，跟一班孤兒院小朋友長大，周圍偷呃拐騙。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！