戀愛大過天？傳鄭欣宜停工近兩個月公司都聯絡唔到 經理人林珊珊回應

現年36歲嘅鄭欣宜（Joyce）歌藝得到樂迷廣泛認同，喺樂壇嘅成績亦非常亮麗，今年於多個頒獎典禮勇奪女歌手獎項，事業攀上高峰。雖然欣宜獲得女歌手獎項，不過佢當時以身體不適為理由缺席《十大中文金曲頒獎典禮》及《CHILL CLUB推介榜年度推介22／23》，而事後欣宜亦冇透露病情，甚至連得獎感言都冇公開。欣宜嘅經理人林珊珊今日亦都對傳聞作出回應，證實欣宜因病停工。

鄭欣宜連續缺席兩個頒獎典禮，當時隨即引起網民熱烈討論。今日有傳媒報道欣宜已經全面停工近兩個月，有傳欣宜「扭計」連經理人公司都聯絡唔到佢，另外仲有指佢戀愛大過天，掛住拍拖唔接工作。欣宜經理人林珊珊回應傳聞查詢時就透露欣宜的確係暫時停工，不過就係因為病咗，療傷之中，至於其他細節就不再透露，同時希望大家畀多啲時間欣宜。

據講欣宜新男友Derek比佢年長三年，曾於英國留學，現時就係一名花店老闆，而今年情人節欣宜就喺花店門前打卡。早前欣宜仲被捕獲喺生日期間於男友前往東京旅行，同行仲有髮型師Benjamin，不過欣宜至今都冇正面回應呢段感情。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！