拍攝時患病失眠狀態差 湯洛雯肥到跑唔郁 封「論盡擔當」

湯洛雯揚言已減磅不少。
湯洛雯揚言已減磅不少。

藝人湯洛雯(靚湯)在新劇中被網民取笑肥到跑不動,昨日靚湯現身活動時解釋角色是「論盡擔當」,但直認拍攝期間狀態不佳,身形又腫又脹,強調現已減掉十多磅,務求做個最弗新娘。

陳展鵬、湯洛雯、黃智雯、吳岱融及黃子恆等昨日為無綫劇《隱門》宣傳,網民指靚湯在劇中身形圓潤,追賊時跑不動,跟執法人員的人設不符合,她坦言:「論盡係事實,劇中我係論盡擔當,係滿腔熱誠去查案,只係力有不逮。(本色演出?)都係,我今日着長裙係因為成對腳瘀晒,成日唔小心撞瘀。(追男仔係咪本色演出?)從來未試過,我係被動派。」問到會否因被批肥而不開心?她說:「我上年係重過依家十幾磅,拍《隱門》時狀態好差,因為我得咗胃炎,食好多藥,又瞓唔到,要食安眠藥,當時個人好脹好腫,老咗好多。拍完之後成個人散咗,所以有段時間我話唔拍劇住,要好好休息。依家做運動同睇中醫調理,精神好咗。」年底結婚的她稱有積極減肥,並正籌備婚禮。

誤傷黃智雯 吳岱融心痛

至於黃智雯在劇中經常被「父親」吳岱融虐打,吳岱融透露每場戲都要咬牙切齒演出,笑言擔心演到爆血管。而拍攝其中一場打鬥戲時,他一手拉起智雯再拋落地,當他見到智雯落地時轉了兩個圈,即心知不妙,果然令對方玉腿受傷:「其實蝦人嗰個好陰功,有一下唔小心整傷佢,我好心痛。」

除了被打,智雯亦有一場落水救「老公」黃子恆的情節,她自爆其實不懂游水:「我只係識扮游水,場戲仲要補拍,拍咗兩日浸咗兩次水,浸到甩皮甩骨。」而黃子恆在劇中遇溺身亡,令智雯產生幻覺見到水鬼老公,雖然畫面恐怖,但拍攝花絮中見子恆扮鬼時要忍笑完成。

黃智雯與「衰老竇」吳岱融的戲份,劇迷睇得肉緊。
黃智雯與「衰老竇」吳岱融的戲份,劇迷睇得肉緊。