雅虎香港新聞 「拗直治療」洗腦兼強制禁慾 過來人患創傷後遺萌輕生念頭：望唔到前路
【Yahoo 新聞 LGBTQ 系列報道】企圖將同志由「攣」變「直」的「拗直治療」陸續被多國禁止，但在香港依然存在。過來人張煦峰（Alvin）10多年前參與本港教會機構的拗直治療，一年間受盡「洗腦式」輔導，被灌輸否定同性戀、認定性幻想是「罪」等思想，又被強制禁慾。過度壓抑令他患上抑鬱、焦慮症，多次出現輕生念頭，至今仍有創傷後遺症。Alvin 又接觸到近年接受拗直治療個案，被摧殘至思覺失調。
Alvin 訪問當日帶來兩本日記，是接受拗直治療期間苦無傾訴對象所寫下的記錄，「嗰時每日掙扎太多，後來翻睇日記我都好辛苦，會覺得腰頸痛，好似重返『案發現場』」。
教會宣傳單張「70%同性戀可改變自己」
Alvin 於基督教環境下長大，8、9 歲時察覺自己對男性的興趣，「有次同爸爸一齊沖涼，見到佢身體我竟然有性反應，問爸爸點解，佢只係由性教育角度教我呢啲叫『勃起』」。他一向被公認是循規蹈矩好學生，受異性戀婚姻觀影響，大學時期仍嘗試與異性交往，「同個女仔寫情信寫到交功課咁，最後佢話分手，我一啲感覺都無」。
後來他愛上一名異性戀的基督徒，向對方「出櫃」並提及自己對爸爸軀體的反應。對方說：「咁真係有啲『唔正常』喎，放心實有辦法幫到你」，強調神可幫助他改變性傾向。在恐同環境下長大的Alvin後來看到教會宣傳單張稱「70%同性戀可以改變自己」，遂報名參與教會的拗直治療。
輔導員：做「正常人」可令神喜悅
2005年10月，Alvin首次與拗直治療輔導員會面，輔導目標包括「每日減少對同性興趣的方法」、「認識自己『同性吸引』的形成經過」，「呢啲目標假設咗呢樣嘢（同性戀）係唔正常，令人唔鍾意自己嘅同性性慾」。輔導員又強調Alvin要有「男子氣概」，並不斷尋找同性戀後天成因，「係一種強迫性嘅思考，其實係不斷壓迫緊自己」。輔導員亦將同志與基督徒身份對立，「佢畀兩條路我『揀』，同志好似可以解決寂寞，但得到都唔會滿足；如果做『正常人』可以令到神喜悅，取悅神同取悅自己」。
Alvin於治療期間需參加「生命更新小組」，輔導講義把「禁慾」比喻為「禁酒」，強調成功戒癮就自由，「要照神的心意管理自己的性生活」，「佢哋當性慾係一種癮，淫慾、性幻想同行為係罪。」Alvin越竭力抑制慾望，反變得越渴求，「等於唔准食嘢會越肚餓，有時會一日有6、7次性反應，但我要自己停止，靠睇《聖經》去彌補」。接受治療一年間，Alvin 被要求遏制與性相關的行為，連看電視、電影都要警剔性反應的出現，「到而家我都習慣環境解離，集中唔到望周圍嘅嘢」。
治療1年 心理創傷長達16年
治療約10個月後，Alvin患上抑鬱症及焦慮症，「我覺得自己好似Michael Jackson，不滿膚色同樣貌係咁整容、漂白，但根本改變唔到」，多次出現輕生念頭，「試過坐喺窗邊想跳落去，終於明點解啲人想自殺，因為望唔到前路」。Alvin雖於2006年11月停止治療，但近年仍確診患上因長期身心及人際創傷經歷而形成的「複雜性創傷後壓力症」。
Alvin去年開始研讀性小眾肯定治療（affirmative counseling），學習正確處理「欲改變性傾向」的輔導方式，「要了解佢係咪受咗乜嘢壓力、文化背景而有呢個諗法，亦要講明科學上已研究有咩harm（傷害）」。現時他身兼社工及輔導員，幫助「同」路人，也是自救，「我想同過去嘅自己講，無論過去經歷過啲咩、受過咩傷，我都承諾從今起會好好愛你、接納你，活在當下」。
近年拗直治療個案「脆弱、混亂、對性抗拒」
Alvin不時接觸同志個案，近年接受拗直治療後「都係好脆弱同混亂，亦都抗拒sex，甚至有思覺失調」。他聽聞有女同志在輔導期間被迫看女性相片，其後疑被注射藥物導致嘔吐，「由我當年『心理虐待』拗直，退步到十幾年後有『身體虐待』，當事人仲係under 18歲」。
處理同志求助個案逾20年、「香港彩虹」創辦人張錦雄指，香港不少學校、機構均有宗教背景，「當學校要轉介同志case（個案）嘅時候都會畀教會機構，因為資源多啲，好少會畀其他同志團體」。本身亦是基督徒的張，怒批相關治療只是自欺欺人，最終只令同志陷入流於形式的異性戀婚姻，「你都唔會想異性戀嫁一個咁嘅人。放過同志，等於放過返異性戀」。
