換命真相｜大結局推翻之前穿越情節 網民直斥爛尾：前二十四集白睇

TVB劇集《換命真相》穿越情節本身引嚟唔少讚賞，不過噚晚（21日）播出大結局，將之前「穿越」劇情一一推翻，畀網民直斥爛尾，更形容為「年度爛劇」。

《換命真相》大結局中講述，康永亮（蕭徽勇飾）背叛表哥康永仁（林韋辰飾）拍低佢指使買兇殺人罪證，康永亮放火燒維利大廈過程中，仲將康仲琪（林凱恩飾）困於維利大廈，康永仁望住個囡被倒塌下來嘅石牆壓住；時光（譚俊彥飾）則與康永仁上到天台激烈糾纏，最後決定與康永仁同歸於盡一齊墮樓身亡。

不過，鏡頭一轉就轉到去打扮得極度「宅男」嘅朴寶劍（朱敏瀚飾）身上，交代之前嘅穿越劇情只係朴寶劍創作嘅「睡公主的寶劍」小說情節，內容全屬虛構；現實中時光與Hailey（鄧佩儀飾）已身亡，朱筱筱（陳庭欣飾）唔係卧底，楊紫山（劉佩玥飾）係一名老師，亦無同劉星（丘梓謙飾）一齊到；至於歐陽家純（蔣家旻飾）昏迷半年後醒返，仲叫楊紫山與朴寶劍將日記內藏有康永仁犯罪證據嘅SD卡交畀警方。

《換命真相》監製黃偉聲曾向媒體透露，本身諗咗兩個結局，但考慮到內地審批問題先揀咗呢個結局，TVB亦好快將大結局精華片段發佈至「See See TVB」YouTube頻道，但網民明顯唔賣帳，紛紛留言指結局爛尾：「這個結局我真的是想吐血啊，爛到…」、「前二十四集白睇」、「如果大家仲係唔gur，可以忽略最後果15分鐘。但都係sad ending」、「又係為左大陸審批攪個寫小說結局出黎，同啲鬼片到最後話係精神病差唔多，真係好趕客.....」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！