搞活夜市｜見證銅鑼灣不夜天 麻雀館老闆促重發小販牌及放過霓虹招牌

政府提倡「搞活」香港夜市，在銅鑼灣開麻雀館的張家寧見證過昔日夜市的繁華。在他眼中，當年「不夜天」渾然天成：麻雀館、舞廳、夜總會、戲院和小販的人聲鼎沸，加上各式霓虹招牌的光影，構成富香港特色的夜生活風景。然而黃金時代不復返，他感歎現時入夜後的銅鑼灣水靜鵝飛，「連便利店都提早閂門」。他認為當局須考慮重發小販牌照及「放過」霓虹招牌，才有望重振夜市經濟。

攝影記者：Billy H.C. Kwok

開關後客人外遊 麻雀館生意倒跌兩成

對香港蔴雀娛樂公司第三代傳人張家寧來說，疫後復常並不代表生意復常。他接受《Yahoo新聞》訪問時說：「大環境市道差，反而COVID期間有段時間生意唔錯，而家大部份客人都去旅行、返大陸」。與開關之前比較，生意還倒跌兩成，「佢哋打麻雀時間少咗，以前最少打三個鐘，而家個零鐘就走；注碼都會細咗，以前打開500/1000（元），而家會打300/600甚至200/400」，更遑論生意回到疫情前水平。他指現在銅鑼灣、灣仔一帶入夜後「好似歐洲咁，咩都閂晒」，相比疫情前還有不少宵夜餐廳，「粥粉麵飯咩都有」，現時甚為「靜局」。

麻雀館是夜生活的代名詞，張家寧感受甚深，由1969年至今多次搬遷，從未離開銅鑼灣與灣仔之間的駱克道，「八、九十年代嘅時候，香港係好多嘢玩」。八十年代有新杜老誌夜總會、巴喇沙餐廳夜總會、各式酒吧等，張指當年駱克道還有不少紋身店，吸引外籍水兵紋身，可算是紋身玩樂「一條龍」。

駱克道經濟「內循環」

張家寧續指，七、八十年代市民吃過晚飯後到酒吧消遣，然後到麻雀館耍樂、到夜總會跳茶舞，還可以來個桑拿浴，「嗰時去到半夜三四點，條街都仲係好多人」。他記得父親當年還有一個「駱克道內循環論」，「夜總會返工嘅小姐，收工搭的士返屋企，之後的士司機又會返嚟打麻雀、桑拿浴，又有啲人再去返夜總會，內循性好高，大家都受惠」。不過現時大型夜總會沒落，桑拿浴室寥寥可數，夜生活的光環褪色，「呢個都係個連鎖反應，因為各行各業都係息息相關」。

夜生活離不開飲食。張家寧憶述，當年大牌檔和小販甚有風味，「平靚正、又聚到人」，慨嘆「小販其實係一個唔能夠抹煞嘅行業嚟」。不論魚蛋牛雜檔，抑或買少見少的炒栗子煨蕃薯檔攤，都是夜市元素。他仍然記得戲院門外燒魷魚檔散發的魷魚香、一蚊一串魚蛋、鴨腎、糖蔥餅，就像台灣和泰國的夜市，「個feel好好，而家香港就係無咗呢種意欲」。

他續指，「以前總統戲院，國泰戲院、京都戲院附近就最多小販」，「唔通咁好食煨蕃薯、熱辣辣炒栗子，到咗我個仔嗰代就無？」回想八十年代中，政府以衞生為由開始取締無牌熟食小販，張指現時市民思維進步，「其實香港人好有良心，畀你（客人）食得嘅佢都食，當你有適當規管佢哋，我覺得香港人好多都自律，唔會畀啲有菌嘅嘢人食」，希望重啟小販發牌制度，「不論係香港人定遊客，都可以欣賞到香港特色，呢啲嘢美國唔會有、加拿大唔會有」。

麻雀館霓虹招牌被拆

多年來張家寧亦遇過不少外國遊客，他指不少外國人是透過電影認識香港，「港產片、功夫片、廟街、女人街」，還有鏡頭下的霓虹招牌，「五光十色嘅霓虹燈，係香港最靚嘅地方」。談起招牌，他就「一殼眼淚」，香港蔴雀娛樂的特色霓虹招牌在約十年前難逃清拆命運。他建議政府「放過霓虹燈招牌一命」，允許招牌於合資格人士設計及檢視下，在內街不當風的地方重置，留住「不夜天」的風景，「日本做得到、韓國做得到、台灣做得到，無理由香港做唔到」。

張家寧正為晚市生意費煞思量，最近麻雀館與手機麻雀遊戲《明星3缺1》合作，客人在館內下載試玩，可按時段送贈食品和飲品。張家寧歡迎年輕人到訪體驗，了解麻雀館文化及香港麻雀文化，「麻雀館真係得香港先有，歡迎大家嚟睇吓、了解吓，而家嘅麻雀館已經唔再係三教九流嘅地方」。活動即日起至本周四（9月7日），費用全免。