搵《街霸》軍佬代言拍廣告 日本髮蠟賣斷市

各位去開日本嘅朋友,其中一件藥房必掃產品當然就一定有男士用嘅髮蠟啦;日本亦的確有數不盡嘅品牌,有時真係花多眼亂,大家人揀都唔知點揀好!不過今期最爆一定要數呢一款,日日一出就賣斷市!點解咁強?因為佢哋竟然搵咗《街頭霸王》核心角色之一嘅「軍佬」代言賣廣告!《街霸》今年係30周年,當中主要人物角色,除咗阿龍、阿Ken、春麗,就要數到「軍佬」(Guile);佢一頭豎起梯字型嘅頭髮可以話係佢標誌,而佢出場時用梳向上梳頭呢個動作更加係經典中嘅經典,由佢嚟Sell髮蠟,真係最佳示範!不過用卡通人物代言廣告其實唔係第一次,尤其喺日本,但今次更進一步,直情當「軍佬」係真人,連佢喺影樓拍攝嘅過程都影埋;例如攝影師用相機捕捉佢嘅動作,包括出招例如「腳刀」、「阿力Cool」等,非常過癮。咁搞鬼,難怪係咁賣斷市啦!

用軍佬嚟賣髮蠟廣告,真係諗唔到有咩人比佢更適合囉。

軍佬仲係Studio拍攝,打晒燈咁好專業。

仲一時忍唔住露幾「腳」,整番招「腳刀」畀大家睇下。

相關文章:

樂天免稅掂做唔住?海外店勁蝕倒閉

歐洲機場大擠塞 旅客入境要排4個鐘

人在外地遇上颱風 航班取消點算好?

【立即讚好】全新 Yahoo 旅遊 Facebook 專頁
Yahoo 旅遊以全新樣貌登場,Facebook 專頁當然同時煥然一新!立即讚好,每日睇盡旅遊新資訊!