政Whats噏:「潛水」多時今再現身 徐英偉落區派飯

徐英偉(左)現真身同鄭泳舜落區派飯。

徐英偉因今年初出席「洪門宴」,引來公眾抨擊,其後於1月31日請辭,2月底遭免去民政事務局局長一職。呢幾個月嚟佢一直無乜聲氣,未有公開露面。不過,繼日前佢喺Facebook突然上水後,今日(5日)更加現真身,同黨友、議員鄭泳舜落區派飯喎!

鄭泳舜喺社交平台貼文,話佢今日又落區派飯,不過就多咗個拍檔一齊派喎,係邊個呢?原來係前民政事務局局長徐英偉,鄭仲稱呼佢做「好兄弟」添。喺照片所見,兩人一齊喺一間餐廳外包裝飯盒,將啲餸同埋飯擺入外賣盒中,再派畀街坊。

鄭又形容對方係徐老闆,因為係徐負責買飯票派飯架喎。鄭又話,徐不但同佢一齊落區,亦都係佢嘅球場隊友,話既然球場已經重開,係時候約返場籃球賽或者欖球賽咁話,不過都係訂到場先算啦!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能