效力無綫22年章志文約滿離巢 7月將舉家移民加拿大過新生活

近年越來越多藝人離開TVB，最新就有效力22年嘅《流行都市》主持章志文，佢喺近日正式約滿無綫，並計劃於今年7月舉家移民加拿大過新生活。前日（15日）係佢最後一日錄影《流行都市》，一班節目主持好友及幕後工作人員送上寫上「22」字嘅蛋糕為佢餞行，例如安德尊、林淑敏、劉彩玉、姚嘉妮及宋芝齡等等，令佢感到驚喜及大為感動，更一度流下男兒淚。

現年43歲嘅章志文，喺加拿大完成心理學學位，喺2000年回流香港並入讀第13期無綫藝員班，畢業後便加入無綫拍劇、做主持及司儀工作，前日係佢最後一日錄影《流行都市》，喺講再見後一班節目主持好友立即上前送上蛋糕為佢餞行，場面既溫馨又窩心。喺接受《無綫娛樂新聞報道》時，佢一度哽咽話好多謝大家，亦都好難喺一間公司做22年，同佢哋好似一家人咁互相扶持。

而佢喺接受傳媒訪問時就話將會喺7月同太太陳念君及囝囝移民加拿大，仲話其實喺一至兩年前已經有移民嘅打算，不過因為疫情嘅關係，佢哋都未有機會前往當地睇下學校環境或工作情況，而家香港不斷停面授課堂，再加上佢哋唔想囝囝太遲去當地，所以就有呢個決定。至於往後嘅工作方面，佢就話暫時未有安排，不過相信主會帶領我哋一家。而佢亦話自己做咗電視界22年，喺加拿大都有做過電視台工作，所以都希望有機會做返呢行，做幕前或幕後工作，甚至係KOL帶貨都可以嘗試。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！