文念中映後談、坂本龍一遺作香港首映 — 光影藝術祭盼帶影迷回歸戲院

是次「Life is Art 光影藝術祭」由極具爭議的時裝設計師 John Galliano 紀錄片《JOHN GALLIANO的高山低谷》打頭陣。他曾擔任 Dior 首席設計師達 15 年，突破品牌風格，將時裝融入中國佛教、美洲原住民、非洲馬賽族等，被譽為近代最傑出時裝設計師。然而工作壓力令他染上惡習，2011 年曾因酒後失言，被指發表了反猶太言論捱批，最終被品牌解僱。電影由奧斯卡得獎導演 Kevin Macdonald 執導，探討失言事件背後的故事。Galliano 曾向傳媒解釋拍攝該片的原因：「I’m not doing the film, because I want to be forgiven. I’m doing the film to be a little more understood. （我不是因為想被原諒而拍攝這部電影，是因為我希望能更被理解）」。蔡靄兒指，當初觀看該片深受打動，希望帶給香港觀眾，「我唔係一個熟時裝嘅人，但我睇到淚流滿面，因為每個人都會遇到挫折，咁應該點去應對呢？」。

今屆電影節另一套開幕電影《維梅爾：光影大師》則獲藝術迷追捧。維梅爾（Vermeer）與梵高、林布蘭並列「荷蘭三大畫家」，經典鉅作包括《戴珍珠耳環的少女》。今年春季，荷蘭國立博物館舉辦歷來規模最大的維梅爾展覽，一票難求。此電影將展覽搬上大銀幕，展出維梅爾 28 件稀世名畫，觀眾可近距離欣賞他獨特的用色和光影技巧。

壓軸電影為已故鋼琴家、配樂大師坂本龍一遺作紀錄片《OPUS》。坂本龍一今年不敵癌魔逝世，離世前數月舉辦最後一場演奏會，該片紀錄他在音樂中得到解脫。該片首次於香港上映，由兒子空音央執導，蔡靄兒形容道：「呢次一定唔會係佢彈得最好嘅一次，但係好動人」。

「希望大家多啲支持香港戲院」

蔡續指，今屆電影節每齣作品由配樂、場地、服裝統統都蘊含美學，「將故事嘅訊息、感覺、涵養帶出嚟，就算佢個設計好好，但你睇完套戲感受唔到訊息，其實嗰個設計係失敗」。每齣電影都關於設計界各範疇的大小人物，「每套電影都好似入去認識一個人，聽佢講心事，係一期一會」。她指疫後香港電影院票房尚有很大進步空間，期望吸引影迷回歸戲院，「大家都以為疫情之後會復常，希望大家多啲支持香港嘅戲院，入返嚟睇戲，嗰件事同你喺屋企睇戲真係唔同」。

許鞍華紀錄片《好好拍電影》是今屆電影節的港產片代表之一，由文念中執導，探討許成長經歷和成為電影人的心路歷程。文念中接受《Yahoo 新聞》專訪時表示，多年來為許鞍華作品擔任美術指導，該片 2016 年開始拍攝，過程長達約 4 年，「當初係覺得點解好似無乜電影人嘅紀錄片呢？而我一向好欣賞佢（許）嘅態度，佢係其中一個會親手畫晒所有分鏡嘅導演，做好多功課」。

《好好拍電影》觸及港人身份認同

《好》亦談及香港社會與電影工業的變遷，以及港人身份認同問題。電影曾於 2020 年上映，對於是次重映，文希望港人如許鞍華一樣保持熱誠，「喺我哋自己熟悉嘅崗位上做好自己嘅嘢，而佢最能夠做嘅就係拍戲，去表達對社會嘅睇法同感受，呢樣放喺咩時候對觀眾都係一個好好嘅提醒」。

現時繼續為香港電影擔任美指的文念中指出，美指需要配合不同作品的風格，因此每次都是嶄新挑戰，「例如《流水落花》鄭秀文做寄養家庭嘅媽媽，佢要甩咗明星嘅味；《金手指》梁朝偉要做金融大鱷，造型要浮誇但又要啲未見過嘅嘢」。為每個角色設計造型時，他需與演員溝通，尊重對方意願，「到最後要幫到佢入戲先得，你嗰樣嘢（設計）唔應該成為佢一個負擔」。

《設計大師 Bruce Mau》探討可持續設計

香港設計中心業務發展及項目總監林美華指，今屆電影節屬香港設計節的「設計營商周城區活動」（CityProg）其中一環，旨在讓公眾更認識設計，「大眾可能覺得設計同商業好掛勾，但其實好嘅設計係融入你生活入面，而你完全唔為意」。戲院則是大眾化渠道讓人理解設計，「用 soft（軟性）少少嘅渠道講唔同設計範疇嘅功效同價值」。

林續指，今年 CityProg 提倡「循環設計」（Circular Design），意指運用再生使用等方法優先考慮使用可循環再用的組件，或設計易於維修或再製造的產品。電影節其中一部電影《設計大師 Bruce Mau》正是探討可持續設計的重要性。Bruce 的客戶包括可口可樂，眼見該品牌有逾億個膠樽被丟棄。由製造鏈改革到廣告宣傳，他將可口可樂改造為可持續企業。「Maus 嘅設計係以生命為本，點樣去尊重大自然、動物與科技同人嘅關係，我哋（設計師）其實有呢個責任，因為有份創造消費嘅慾望，但點樣可以更耐用、被循環再用呢？」，林希望觀眾可透過電影理解設計、消費與可持續發展可並肩而行。