文頌男最後一次主持 J2《不正常愛情研究所》 直言遺憾有癌症：感覺真係就嚟死

J2節目《不正常愛情研究所》主持文頌男（Koba）確診罹患罕見尤文氏肉瘤癌症，已停工數月頻頻出入醫院覆診及接受化療；今晚（21日）將播出Koba最後一次主持《不正常愛情研究所》嘅一集，Koba於社交平台分享「癌病日記」，感慨表示唔經唔覺已經兩年，又將其形容為「大結局」：「《不正常愛情研究所》要大結局！！！！唔經唔覺原來已經拍咗兩年（雖然後期有啲集數因為患癌拍唔到），第一次真正主持一個電視節目喺過程中真係學咗好多嘢，真的。幫助到我對於做幕前呢樣嘢而且一定一定要多謝各位主持，佢哋真係照顧咗我好多，好似見你少出聲會被人CUE、幫手打完場、兜返靚...…我由開頭KAM吓KAM吓到最後嗰集⋯都仲係KAM吓KAM吓。成為大家嘅下把。」又感謝節目幕後團隊，指成個節目唯一遺憾就係自已患病：「唯一嘅遺憾，就係我突然有癌症。唔可以同大家一齊繼續拍攝，希望將來仲有機會同大家一齊拍嘢啦。」

Koba於節目上雖然身形明顯消瘦，而且戴上Cap帽，但樣貌睇起上嚟都感覺精神，而且表現投入，Busker阿紀談到點樣應付熱情粉絲期間，Koba更即席扮演痴情小Fans，表現唔似一個癌症病人。Koba於社交平台透露該集係一月狀態較好時返咗去開一日廠拍攝，其實Koba亦時常分享「癌病日記」，更曾直播交代病況，表示現時於椎間近盤骨附近位置有個大約6x6x4cm嘅惡性腫瘤，由於壓住咗啲神經，所以行動唔方便同週不時會劇痛，亦因坐唔到嘅關係，每次覆診都係跪喺到，太攰就要瞓病床，Koba亦於早前透露精神越嚟越差，每次做完化療都會瘦好多，要不停逼自己飲啲營養及靠意志力去堅持，不過及後Koba表示最近感覺好好多，一星期前感覺真係就嚟死，亦分享光頭照感激好友慰問：「感謝慰問，送咗靚靚花花，睇到你嘅鼓勵，令我更有動力去堅持，戰勝病魔。非重點！！我依家除咗無頭髮，仲變埋無眉男。」唔少網民都留言鼓勵Koba：「好堅強，幸福一定會跟住你」、「加油，好快治療見到有眉目」、「你好叻仔！加油！幾辛苦都要頂住」、「都仲係好靚仔，加油呀！」、「一定會越來越好」等等。