雅虎香港新聞 斥裕民市集如廢墟 屹立觀塘 47 年文具佬不言退：做到唔郁得為止
【Yahoo 新聞觀塘系列報道】在香港做小販難，在觀塘做小販更難。「海記文具」在觀塘經營近半世紀，受重建影響三度搬遷，去年落戶人流凋零的裕民市集。小販光輝歲月不再，但區內文具店所剩無幾，83 歲老闆勞國坤（海叔）仍然頂住、頂得住，堅持平賣來佬靚貨，「我能夠企到今時今日，證明我成功啦」。
文字記者：盧珮瑤
攝影記者：H.H.
訪問期間，一位女士前來選購鉛筆，83 歲海叔中氣十足：「HB2，夠晒㗎喇！」說罷拿起鉛筆在筆記簿劃了幾筆，再掏出店中皇牌── Sakura 櫻花牌擦膠，「試吓呢隻擦膠，你同我擦乾淨佢！」女顧客咯咯地邊笑邊擦，海叔轉向記者道：「最 top 嘅 sales 嚟㗎我呢啲！」最終做成了生意。
養一家七口 親戚帶挈入行賣文具
海叔年輕時在灣仔一間酒店任職工程部，養活一家七口，頗為吃力，在北角春秧街經營文具店的叔父對他說：「你唔掂㗎喇，畀啲嘢你賣啦！」叔父的「海記文具」於 1974 年在瑞和街街市開分店，交給海叔夫婦打理，又向各批發行穿針引線，「所以到而家Pentel有貨必定會通知我，全部正貨嚟」。
「每日 5 點幾起身，幫老婆開七、八個字檔，搭 7 點 10 分嘅車返灣仔；收工坐 641 返嚟觀塘幫手收檔，4 個字返到！好準時㗎我哋！」，這種穿梭兩份工的生活，海叔由 36 歲持續至 60 歲退休，「搞掂到屋企、又畀到供樓會，幾個細路讀大學我都無借過錢」。
學生哥清晨等開檔掃貨開學
13年後街市拆卸，海叔被安置到物華街臨時小販市場，「要自己搭個棚頂，翻風落雨濕晒，但嗰陣好旺，係街坊必經之地」。在物華街那 26 年，是他最懷念的時期，「全盛時期好犀利，做到無飯食，夜晚一兩點仲要執貨補貨」。那年代沒有 zoom，開學季節學生哥清晨蜂擁檔口等海叔出現，買齊架生上學，「開學嗰陣一日四千蚊點都有，平常都做到二、三千，廿幾年前喎！而家呢度開學都係六、七百」。2014年觀塘市中心重建，物華街臨時市場清拆，過百小販搬往同仁市集，直至裕民市集落成。
那些年的學生哥現已結婚生子，間中帶子女幫襯海叔。幾代學生都走不出海叔的五指山，店中的「來佬貨」歸功不少。中國製造橫行的年代，海記文具以性價比高的外國貨取勝，「有個客試過拎住一卷3M膠紙嚟嘈話好化學，原來喺出面舖頭買，Made in China，我嗰隻係美國製造，佢試完第二日即刻嚟買多幾卷」。海記賣的還有信譽，「我宗旨係唔會搵人笨，慢慢解釋清楚畀啲客聽，唔啱使唔緊要，千祈唔好鬧人」。同一款螢光筆海叔賣$5.5，中環文具店賣$10，「人哋租貴、人工貴，我賣$5.5都有個零銀錢賺啦」。
「地獄市集」 一日生意額低至百多元
時代變遷加上大型文具店興起，生意額風光不再，去年4月到裕民市集後更陷入低潮。市集位於裕民坊地庫，因人流凋零而有「地獄市集」之稱，「（市集開業）第一日做二千幾蚊生意，到第三、四日已經變咗廢墟，最差試過得百幾蚊」。海記原本開朝八晚六，最近提早至4時關門。但海叔心中仍有團火，不願言退，「觀塘嗰陣10幾間文具舖，我一樣照開，而家其他閂晒門，我能夠企到今時今日，證明我成功啦！做到唔郁得為止啦」。
