新何太同林作合作破局互相指責 再上《東張》爆料自揭點解網名係「千語BB」

《東張西望》令何伯同新何太成為新聞人物，話題燒足一個禮拜以為玩完？社交帳戶被公開之後，新何太反而更高調同網友玩「你問我答」，仲同老公突發開直播時錫咀，又透露打算「造人」，甚至大爆何伯「一晚五次」！

新何太直播時提到會再上《東張西望》，而《東張》亦播出預告，當中新何太會解釋做咩公開閨房事，佢話係「衝口而出」；另外新何太會親回點解社交帳號名稱叫「千語BB生活錄語」，仲驚爆新何太原來之前都做過「何太」！

何太話題大熱，抽水王林作當然參與埋一份，佢矢言願意出10萬蚊同何太合作教人煲湯同處理資產，更抵死係課程費用為450蚊，目標招收1萬人，正好要為何伯搵返失去嘅450萬元！何太回覆網民留言時話「不了」，後來林作向何太道歉且承認出手過低，更向何太表示「得，我大你100萬！」。林作之後出post聲稱何太私信佢，仲問分帳如何。但係後來二人談判破裂，林作大鬧何太「甚無禮貌，毫不客氣」，宣布成為何太頭號公敵；而何太就喺直播話唔想同林作合作，「佢出嗰啲條件同講嗰啲嘢，完全唔係佢講嗰樣嘢，所以佢嘅『腎容』（信用）係有問題。」。另外有youtuber聲稱得到新何太錄音回應，聲帶中嘅「新何太」指林作唔係出100萬出場費俾佢，而係以分帳形式計算，收生人數到一定數字先會收到過百萬。

而林作亦出post公開雙方短信內容，指已提出將學費拆帳3成俾何太，再保底至少有50萬，如果收到3千位學生的話，新何太都可以分到100萬。林作話「我最憤慨嘅，係我從來冇講要1萬人先俾錢你！點解要咁屈我？！」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！