新增回應 ｜為梁詠琪執導MV捲抄襲風波 袁劍偉：正與心呼吸團隊溝通中

【16:25 新增回應 】

今日下午，梁詠琪同袁劍偉嘅團隊都分別向傳媒回應有關事件。梁詠琪經理人指Gigi係受到常霖法師邀請主唱「停一停心呼吸」主題曲同參與MV拍攝，而Gigi並冇參與MV嘅創意部分；至於MV後續處理，會交回「停一停心呼吸」團隊，如有需要，亦會盡力配合。

而身在日本正與MIRROR成員盧瀚霆(Anson Lo）、呂爵安，以及張繼聰拍攝《盜月者》嘅袁劍偉導演就回覆傳媒查詢指啱啱得知事件，正與心呼吸團隊溝通中，亦努力嘗試同Chloeography Project聯絡。

———————————————————————————————————————————

近年與MIRROR成員有唔少合作嘅導演袁劍偉，最近為梁詠琪新歌《停一停．心呼吸》MV執導，但推出無耐就被指控涉嫌抄襲。本地藝術創作團隊CHLOEOGRAPHY PROJECT 喺facebook發文，指Gigi《停一停．心呼吸》MV「出現的視覺影像及其相關的公開宣傳圖像等，不論其拍攝地方、道具使用及演員等所構成的整體影像，皆跟我們團隊 2018年流動舞蹈劇場作品《遙遙之城 Maybe Tomorrow》* (以下簡稱《遙遙之城》) 的多個演出宣傳影像畫面及相片都高度相似，部分畫面的相似度更高達九成」。

CHLOEOGRAPHY PROJECT亦刊出多張相片，比對《遙遙之城》及《停一停．心呼吸》MV畫面相似之處。

涉及今次事件嘅袁劍偉，90年代加入TVB做助導，後來升為導演，主要參與音樂節目製作，因此與同為TVB音樂組出身嘅MIRROR經理人花姐相熟。袁劍偉後來轉做廣告導演，2014年跨界為張學友、林嘉欣主演嘅電影《暗色天堂》執導。舊年袁劍偉執導由MIRROR成員姜濤、陳卓賢(Ian)、呂爵安(Edan)及邱士縉(Stanley）等主演嘅ViuTV劇集《季前賽》。而袁劍偉現時正身在日本，執導由MIRROR嘅盧瀚霆(Anson Lo）同呂爵安，以及張繼聰主演嘅電影《盜月者》。

袁劍偉同現任太太林嘉欣2008年交往，2年後林嘉欣未婚懷孕，二人飛往加拿大註冊結婚。現時二人育有2名女兒。

《停一停．心呼吸》係梁詠琪為同名組織獻唱嘅宣傳歌曲，有關團體「停一停 心呼吸」今早表示已將MV下架，並指「正在全力跟各方了解事件，稍後會作交代，感謝各方的關注」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！