新民黨選委李梓敬盛讚李家超「好識做」 指葉劉不輸蝕 ：靚橙同靚蘋果都好食

獲國務院批准辭去政務司司長一職的李家超，今宣布參選特首，被指是北京認可的唯一人選。新民黨立法會議員李梓敬作為特首選委，認為李家超絕對勝任特首一職，盛讚他願意聆聽意見、「方方面面都好識做」，相反現任特首林鄭月娥卻「以為自己乜都識晒」。他期望李家超出任特首後「改革」公務員制度，否則只會助長公務員「陽奉陰違」、「繼續貼連儂牆」。對於同樣做過保安局局長的新民黨主席葉劉淑儀無緣出選，李梓敬指葉太絕不比李家超「輸蝕」，「一個係靚嘅橙 ，一個係靚嘅蘋果，大家都好食嘅，不過睇吓你鍾意食邊樣」。

文字記者：Phoebe

攝影記者：Davies

「點解文官治港就無問題？」

自李家超辭職準備參選特首，即被質疑「武官治港」，李梓敬反問：「有咩問題？」他指回歸後經歷四位特首管治，「點解文官治港就無問題？商人又話商人治港，嗰時我選立法會，啲人話我KOL治港㖭啦！呢個人總有個背景，適合管治香港就可以」。他相信，經過兩名政務官出身的特首治港，北京希望尋找適合香港的其他模式。李家超於紀律部隊出身，亦擔任過保安局局長和政務司司長，「佢對政府運作基本上熟識，唔會好似公務員咁喺體制入面有啲因循，亦唔會好似董建華、梁振英咁，畀人質疑管理唔到公務員」。

回應葉劉無緣參選 「好難講嘅呢個世界」

對於今屆選舉極有可能「無得揀」，他不忘為李家超護航：「唔係李家超自己話想一人參選㗎嘛，幾多人參選唔係佢決定囉」。對於葉劉淑儀無緣出選，李梓敬強調葉太也非常勝任特首一職，只是「時間性問題」 ，視乎「當時大家覺得社會需要啲乜嘢」。他指葉太也能在立法會等平台發揮，「好難講嘅呢個世界，特首又只得一個。任何人係適當做呢個崗位，帶領到香港再出發，我相信佢都樂見」。

李梓敬續指，下任特首要有「大破大立」的膽識，李家超具備此條件，「要敢於挑戰現有程序，亦係點解公務員唔適合，因為佢哋唔會咁做」。李家超加入問責班子後曾處理反修例運動、國安法實施等大事件，「睇返鄧炳強、曾偉雄等等，警隊出身嘅人都係行得比較前，執行能力會強啲」，亦反映他具備國家安全意識。

李梓敬期望李家超的政綱聚焦為《基本法》23條立法及改革公務員制度，以免公務員「陽奉陰違」，「每個人可以有自己嘅諗法，但唔可以表達出嚟，唔可以因為呢個立場影響到工作」。公務員制度理應「賞善罰惡」，「如果依家都解僱唔到（表態反政府的公務員），咪繼續（在辦公室）貼連儂牆囉」。

未見不同陣營有大反彈 「上網睇唔到囉」

李梓敬形容李家超為人「平易近人、面面俱圓」，「佢好願意聽人意見，亦都有啲推心置腹嘅朋友」。他憶迹，以往處理國安事務時，李家超會主動問及他們意見，亦告知他們工作進度，「方方面面都好識做」。他形容建制派支持者均認為李家超是特首適合人選，即使不同陣營的人亦未見很大反彈，「當然邊個做佢哋都唔會好滿意，但又睇唔到好大反彈......上網睇唔到囉」。

狠批林鄭「以為自己乜都識晒」 建制派區選為其「埋單」

相比不求連任特首的林鄭月娥，李梓敬直言李家超是更理想的人選，狠評林鄭「以為自己乜都識晒」，「好多時未必咁聽人意見，我哋圈子入面嘅人係會好重視呢樣嘢」。李梓敬又重提2019年區選建制派幾乎全軍覆沒，其時林鄭在施政過程鮮有建制派參與，「你做過啲乜，我哋同公眾知嘅時間差唔多一樣，根本成個過程無主導權，但去到區會我哋、包括我自己都未能夠成功連任......睇返呢兩年，有邊個問責官員因為咁而被問責過呢？點解你唔同我哋分享施政過程，但我哋要幫你『埋單』？」