新聞女王大結局劇透！阿傑活喺Man姐幻想之中？譚俊彥透露角色設定...

由佘詩曼、馬國明及李施嬅主演嘅TVB台慶劇《新聞女王》播出以來反響熱烈，大結局將於冬至（22日）當晚連播兩小時。日前，內地平台搶先播出第26集大結局，黃宗澤驚喜壓軸出場與Man姐（佘詩曼飾）對話，似乎為續集埋伏筆。不過，更多人關心嘅係譚俊彥飾演嘅Man姐前男友阿傑到底係真人定係佘詩曼幻覺；近日有網民列下疑點，推論阿傑早於當年因拍攝「賊王案」期間遇到槍戰身亡，並唔係僅腿部中槍致跛腳。

疑點1：Man姐與阿傑見面地點只有車房
Man姐與阿傑並無太多同框時間，每次Man姐搵阿傑都係遇到困難或情緒低落之時。除咗回憶畫面阿傑曾現身SNK，每次見面地點都係喺阿傑工作嘅車房，同時僅得二人，絕無第三者。

疑點2：車房電視播2013年作品
有網民留意到，Man姐到訪車房時，車房內嘅電視機正播放2013年劇集《戀愛季節》，而阿傑中槍年份正正就係2013年，代表有機會係Man姐與阿傑嘅回憶停留咗喺2013年。

疑點3：Man姐自己揸車
其中劇情講到阿傑喺停車場等Man姐話送佢返屋企，但最後鏡頭只影到Man姐自己走向司機位開車。

疑點4：阿傑對白另有意思？
阿傑於2022年聖誕節夜晚，與Man姐表示 ：「你知道嗎？我好耐無過聖誕節了。」令人感到疑惑，認為如果阿傑仍在生的話點會好耐無過聖誕。

疑點5：無同事人知道阿傑去向
其中一集，一班SNK同事提到Man姐當年由無名記者上位一事，當中講起多年前嘅「賊王案」，包括阿傑擔任攝影師拍攝；不過自「賊王案」後，阿傑就無再出現過，就連SNK同事都無一個知道佢下落。

網民列出種種疑點猜測阿傑只係活喺Man姐幻想之中，不過有部分網民亦反駁對方諗太多，表示不如話成套劇都係George（馬國明飾）嘅幻想。譚俊彥亦向媒體回應傳聞，表示設定嗰個空間只有佢同Man姐，等Man姐可以自在地表露自己嘅情緒，又指以佢嘅理解，阿傑係一個活生生嘅人嚟，並無死到。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！