新聞女王｜佘詩曼記者會受訪笑指何依婷同奸角無反差 一句話化解尷尬

由佘詩曼、李施嬅及馬國明主演嘅台慶重頭劇《新聞女王》下周一正式播出，日前（14日）一班劇中演員出席記者會為劇集做宣傳，而佘詩曼被安排與李施嬅及何依婷接受《東張西望》主持容羨媛訪問，期間佘詩曼就笑住指何依婷同劇中奸角無反差，搞到氣氛有少少尷尬。

佘詩曼喺劇中飾演充滿霸氣嘅「Man姐」文慧心，李施嬅就飾演好有態度嘅午間新聞主播張家妍，而備受力捧嘅何依婷就飾演Man姐頭馬徐曉薇。三位女主角喺接受《東張西望》訪問時被問到佢哋真人同角色反差大唔大，而阿佘及李施嬅就分別表示「極大」同「超大」，之後阿佘就問何依婷：「咁你呢？」，何依婷就話：「超級大」，點知阿佘就講：「唔係呀，我覺得你真人都係咁」，然後望咗一眼何依婷就轉身向住李施嬅，而李施嬅一聽到就大笑咗出嚟，主持亦有少許愕然，何依婷就尷尬表示：「Man姐太入戲啦！」

何依婷形容劇中角色係：「我真人容易因為小事就覺得好開心同幸福嘅人，同我角色好大反差，個角色根本都唔感恩，又反骨。」而好似Man姐上身嘅阿佘就啤住何依婷，跟住佢就即刻攬一攬阿佘話：「Man姐又嬲啦！太入戲啦！」，而企喺隔離嘅李施嬅就未有俾反應。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！