新聞女王2丨原班人馬開續集 黃宗澤加盟助陣 網民大呼期待：Man姐強勢回歸

上年TVB台慶劇《新聞女王》由佘詩曼、馬國明、李施嬅、高海寧、何依婷及王敏奕主演，劇集贏盡口碑和收視之外，喺《TVB萬千星輝頒獎典禮2023》成為大贏家，奪得8個獎項，包括佘詩曼奪得四料視后成大滿貫。劇集播出後，一直有指會開拍續集，去到今日（11日），TVB終於公佈好消息啦！

《新聞女王》大結局中，飛爺（鄧智堅飾）向方太（龔慈恩飾）表示搵到第二春辭職移民去馬來西亞，古肇華（黃宗澤飾）驚喜出現於SNK大堂。據指，古肇華係由方太派來，不過當古肇華與Man姐碰面時，卻表示：「『飛爺』個位我冇興趣，SNK我都冇興趣，不過我對你呢個『新聞女王』就有啲興趣。因為喺我領域，只有國王，冇女王。」，似為開拍續集埋下伏線，令唔少觀眾大呼期待。去到今日，TVB喺影視博覽上宣布即將原班人馬開拍《新聞女王2》，預計明年年初開機拍攝。

喺影視博覽上，劇中主要演員馬國明、黃宗澤及高海寧都有現身支持，雖然佘詩曼未有出席，不過都有以Man姐身份霸氣拍片支持：「我文慧心無論去到邊度做新聞，都有佢嘅公信力，就我一個都夠贏你SNK成個台啦。敢唔敢用今晚PRIME TIMES NEWS同我賭？記住新聞界只有一個新聞女王。」

開拍續集消息一出後，唔少網民已經表示期待，紛紛留言支持「Man姐強勢回歸」、「啊啊啊啊原班人馬！！我Man永遠的新聞女王！期待佘詩曼文慧心！」、「期待黄宗澤和佘詩曼的合作」、「什麼時候開播呀？期待期待」及「期待期待太期待了～」等等。

另外，佘詩曼有份主演嘅《家族榮耀之繼承者》宣傳海報亦已經釋出，佢喺海報中嘅造型同Man姐截然不同，同樣令人期待。而黃宗澤除咗有新加盟嘅《新聞女王2》之外，佢仲有《法證先鋒6》及《執法者們》排隊等住出街，唔知觀眾幾時可以睇到佢哋喺新劇嘅演出呢？！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！