方中信女兒符迦晴與媽媽莫可欣十足餅印 成馬術隊一員望參加亞運

方中信和1993年港姐冠軍莫可欣2008年因懷孕結婚，誕下女兒符迦晴後，莫可欣淡出幕前，專心照顧家庭並努力栽培女兒，除咗安排女兒讀國際學校，亦為佢報讀游水、騎馬、法文、豎琴等興趣班。而原來，16歲符迦晴已成為香港賽馬會青少年馬術隊成員；日前，符迦晴接受RTHK香港電台《港台體壇123》節目訪問，講廣東話有啲鬼鬼哋非常可愛之除，樣貌更與媽媽十足餅印。

符迦晴7歲開始學習騎馬，現時為香港賽馬會青少年馬術隊成員，賽馬會為其提供全方位支援和指導，參加香港及海外舉行訓練和比賽；符迦晴主打三項賽馬術項目，曾於2022年10月雙魚河馬術中心三項賽（HKE80組別）奪第四名，去年2月亦於雙魚河馬術中心三項賽（HKE80組別）奪第七名。符迦晴於節目回憶自己細個於朋友騎馬Party初次接觸馬匹嘅感受：「第一次接觸隻馬好溫柔，騎馬Party中會畀你上馬及有人拖住隻馬行。」又表示初初覺得好驚，但後來學識咗就覺得好好玩，亦會餵佢食零食，比賽時幫隻馬紮辮，以培養感情。符迦晴分享自己嘅一日行程，透露每日好早要起身：「7點要上校巴返學，然後我3點半放學，平時我會去騎馬，去雙魚河，然後7點幾返到屋企同Daddy媽咪食飯，之後沖涼做功課。」符迦晴又透露希望將來可代表香港去比賽拎經驗，之後更可以代表香港拎獎牌，目標係參加亞運。被問到點樣平衡學業及騎馬訓練，符迦晴就微笑表示好難，只係見一日做一日。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！