方健儀京都目睹缺德旅客猛力搖櫻花樹 網民一面倒鬧爆：他日佢會有報應

每年嘅櫻花季都會吸引悟少遊客赴日賞櫻，日本各地嘅櫻花景點都會變得人頭湧湧，實行賞櫻打卡拍美照。前主播方健儀近日就同老公前往京都賞櫻，期間遇到有旅客為影靚相，竟然出盡力狂搖櫻花樹枝，令櫻花花瓣可以好似落雪咁跌下。

近日，方健儀與老公前往京都旅行，佢喺餐廳準備食晚飯時，喺玻璃窗見到一班缺德嘅遊客，喺度猛力搖晃櫻花樹枝。方健儀將影片上載到IG，並留言話：「2024.4.15 破天「方」專欄 . 我其實已經返咗來香港近一星期，但仍分享唔少日本櫻花滿開嘅圖片，係開心嘅。但我想講，唔係每幅畫面都美好，請花28秒睇睇呢條賞櫻缺德片段。 . 事發喺京都，洪生與我喺餐廳準備食晚飯，隔著寬大嘅玻璃，見到遠處有一群難以辨認國籍嘅男女，在河邊同櫻花合照時，竟猛力搖晃櫻花樹枝，花瓣如雪片般掉下，營造落櫻浪漫效果。呢班人冇收手，再搖、三搖、四搖、五搖，chok到樹枝都散，棵櫻花好慘好慘。 . 其實，無論喺自己地方，或人哋地方，保護公物呢啲由細到大都講到打喊路嘅普世價值，永遠都會遇到，見到。但最可怕嘅係，當你糾正別人做法時，有人會合理化歪道，我試過紅葉季節見到有人摘紅葉，對方竟話「摘樹葉都係一兩片唧」、「啲葉唔摘遲早都跌」。 . 有人問過我，覺得世上最可怕的是甚麼動物，我毫不猶豫答：「人類」。但我深信，在這可怕群體中仍然有善類，我會繼續選擇做正確及善良的事，希望大家都擁抱上天給我們的美景，別走向歪道，也別合理化歪道。 . 今晚9:30 Facebook Live，我選定一個香港景點，同大家吹吹水。而呢個景點，大阪都有，聽聞喺香港都幾hit。今晚見。 . 《搖呀搖，搖散棵櫻花》 . 專欄全文，喺我Bio中。」

影片出街後，網民一面倒鬧爆呢班旅客，例如「自私的人，為求達到自己少少目的，不惜破壞人家創造的美好環境。就好似為要拍得像熊貓的狗，而去把牠們染毛！根本不是愛牠們。」、「離晒大譜！應該嚴禁佢地入境啦！」、「同感，太自私了。」、「有冇搞錯⋯⋯自私得可怕 ⋯⋯鬼吾望佢好快D頭髮都係咁甩」、「歪理變成合理，繼而變成道理，確實可怕，但現在世界確實四處可見，多謝願意出來說明，讓真理就是真理，歪理都變返真理，支持！」、「佢下世變櫻花樹俾人咁樣搖」、「無品」、「好恐怖，好粗魯啊」、「好憎呢啲人，他日佢會有報應」、「呢啲人不懂得尊重」、「眼看手勿動 見到最尾狂搖個下真係想講粗口」、「真係離晒譜！自私！」、「見到都眼火爆」、「缺德行為，植物都是有生命的啊！」、「咁冇品嘅人都有」及「太可惡這些人。花很漂亮很短期，沒好好欣賞珍惜還破壞，自私。」等等。