方力申再奪先進游泳世錦賽銅牌 兼破香港紀錄 post相解釋當年退役原因

剛過44歲生日嘅方力申，早前飛到多哈參加世界先進游泳錦標賽。小方周二喺IG報喜，表示自己喺40至44歲組別男子200米背泳比賽中獲得銀牌。估唔到尋日小方喺另一項目男子200米四式混合泳比賽中，再贏到一面銅牌。

喺200米背泳攞牌之後，方力申再出戰嘅男子100米背泳決賽，最終以第四名完成賽事。對於再上頒獎台，小方都覺得「超驚喜」。「冇諗過自己越游越好，可能比賽消耗大，踢走咗少少脂肪，頭先200米個人四式，報名時間排第十，游最邊線，諗住自己游自己。頭50米尾二轉塘，游完背第四，游完蛙都係第四，最後自由式第三到池得銅牌。好開心，仲要破咗我個歲數組別嘅香港紀錄。」

上次拎銀牌，方力申出post話要減肥；今次佢就post出登上頒獎台嘅相，自爆當年由泳壇轉戰娛圈嘅原因。小方話「最後請大家留意番最後張相，呢個就係我貪慕虛榮，冇繼續游水，揀咗入娛樂圈，但同時都有讀港大嘅原因。喂呀！個個高我成個頭點爭呀！」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！