是日噏day：「假筍盤」陷阱！那些錙銖必較的庹縮先生

關於揾筍盤，首先需要申明，我對於女士總係希望搵到一個筍盤，表示非常支持。

假設兩個男人其他質素一樣，唔去揀無錢無樓嗰位，選擇有錢有樓嗰位，大佬！人之常情啫！等於男人揀女人，若果兩個女仔其他所有野都一樣，你老虎蟹都揀身型S shape嗰個啦係咪？同我講到好清高，死都要揀肥得黎又平胸嗰個嘅話，come on bro，我只會覺得你偽善。有葫蘆又有邊個想要機場呢？

既然男人有得揀的話，唔會選擇fat but still flat，咁你都應該要認同，女人想揀筍盤，係好合理嘅事。至於後續，會唔會代入「港女質素低要求高」呢個困局，就佢閣下嘅事啦。等於如果你非蒼井空質素不娶，都無人幫到你一樣。

如果認同左「揀筍盤」無罪，接落嚟要處理嘅就係，揀筍盤嘅注意事項。

一般而言，筍盤嘅定義就係一個男人，佢而家搵到錢，喺可見嘅將來亦都持續地搵到錢。遺憾嘅係，呢個定義只不過係面嗰浸。底嗰浸，要取決於佢肯喺你身上花幾多錢。

就好似嗰個老掉牙嘅問題一樣，一個男人賺$10，佢俾晒$10你；同另外一個男人賺$100，佢俾$10你，你應該點揀？

呢個情況，真係好難揀，因為大家都係俾$10，之但係如果改為，賺$100嘅男人，佢俾$11你，事情就易解決好多。梗係揀俾11蚊你嗰個啦！小學雞數學，理解冇難度啦係咪？

如果閣下嘅思想同我一樣理性而又務實，你應該會明白我以下所講嘅「假筍盤」，係幾應該避之則吉。

如果認識得多有錢嘅人，應該好清楚，越有錢嘅人就越庹縮。所以喺現實世界，一般賺$100嗰個，會肯分享$5俾你；賺$1000嗰個，會肯分享$1俾你。

作為一個唔鍾意用職業去歧視人嘅人，我絕對唔會歧視從事金融保險會計ibank律師嘅男士。只不過，咁啱我幾位女性朋友，喺佢哋搵到所謂筍盤伴侶之時。咁啱，真係咁啱，嗰班度叔「假筍盤」，就係從事呢幾個職業。真係冇證據顯示，同佢哋精於計算嘅職業性質有關架拿。

咁呢堆「假筍盤」，究竟做咗啲咩庹縮野，令佢哋「筍得咁假」呢？

1、晚餐基金

精於計算嘅呢位「假筍盤」，月入近6位數字，但係就總覺得同女朋友食飯，唔應該次次都佢俾。即使係食吉野家、譚仔、翠華都好，都應該保持俾錢嘅獨立性。
如是者，有時男仔俾有時女仔俾，但係「假筍盤」竟然好精靈咁計得出，始終都係佢有時俾多啲。

結果，佢諗左一條絕世好橋—— 一條我想像唔到可以咁肉酸嘅橋。

佢成立左一個晚餐基金，每個月兩人各自交出一定嘅同等費用。每次食飯，就動用基金裏面嘅錢去埋單。

Ok fine，我唔係覺得食飯一定要男人埋單，但極其量，好粗疏地一人埋一餐，我覺得都仲合理。但婆仔到向女伴提出成立「晚餐基金」，真係唔係所有人類都做得到。

2、你的樓是我們的，而我的樓是我的

就住什麼非首次置業稅雙倍嘅政策，都曾經聽過一位「假筍盤」嘅超級理論。女友人有日同我呻窮，我話：「你又賺咁多，你老公又賺咁多，邊樹窮啊？睇過？」

原來事緣係，佢老公想自住以外，買多另一層樓。所以佢兩口子住緊嗰幢樓，係填老婆個名，並且由佢老婆一個人供樓晒。「咁其實都唔算好過分丫，大家各自供一幢，各自名，又交少啲稅。」我話。

然後女友人同我講，原來佢結咗婚幾年，佢老公都仲未睇啱第二幢樓。咁即係點呀？即係佢老公一路住緊喺佢老婆一個人供晒嗰度樓度，然後每個月駛佢自己接近6位數字嘅人工。

3、你生日，我買套音響送俾你

一套強勁嘅音響喺一間屋入面，究竟係比男人用多，定女人用多呢？相信大家都心裏有數。曾經聽過一位「假筍盤」，夠膽係女朋友生日嘅時候，斥巨資購入天價音響組合，仲夠膽死補多句：「咁套音響放喺屋企，你都有用架嘛。」

哇，以後個女仔上YouTube睇化妝教學嗰陣，個youtube講野嗰把surround sound，咪親歷其境一樣？咁樣睇youtube，好震撼架喎！

4、咩都家用度扣

本身有俾家用係抵讚嘅，但有趣嘅地方係，一位朋友嘅「假筍盤」老公，買咩都夠膽死入落家用條數度。首先，佢俾嘅家用，佔佢每個月收入大概3%，意思即係，佢有97%嘅收入都可以用來自己洗。但係呢位老公，係買咗啲咩濕星野，都一定記得拎返屋企，claim落家用條數度嘅青年才俊。

家居用品，claim就梗局啦！但係就連佢睇波備用嘅花生啤酒，都一樣會好記得返屋企claim錢。至於有啲咩係直接問佢老婆攞錢，而唔應該用家D錢來填嘅呢？

護髮素！因為佢老公係唔用護髮素嘅。

所以如果，你遇上一位身邊人睇落都覺得係筍盤嘅so called「筍盤」，切忌笑得太做早。

因為好多時越筍嘅盤，就越錙銖必較。

令人頹喪嘅程度，同男人溝咗個蒼井空返屋企，但係個蒼井空原來係性冷感嘅，感覺應該差無幾。

text by Tyler Li (facebook: 泰兄）

圖片來源：machomen.jp