是日噏day：「大台」變「舊台」 沒落速度可能比想像中快

「大台」呢個名稱，係因為從前有所謂「細台」做對比。4月1號之後，當「細台」摺咗，迎來即係Viu TV同港台電視。

兩個電視台係「新電視台」，咁對比之下，舊嗰個就只能叫做舊台。

很重要所以大家跟我重覆三次——
舊台。
舊台。
舊台。

點解「舊台」呢個概念咁重要呢？無論你鍾唔鍾意都好，唔能夠否認係，香港人嘅特性就係貪新厭舊。就算假設舊台製作做得好，有新野，香港人始終會一窩蜂轉船，更何況呢個假設，有唔少人都覺得唔成立呢？

而呢一種貪新忘舊嘅特質，我唔係同你講緊淨係後生仔喎。4月1號隨住亞洲電視關台，已經聽過好幾個廿零30歲嘅朋友whatsapp問我，問究竟港台電視同Viu TV究竟點樣追台。

我：你睇電視嘅咩？
朋友：唔係啊！我老豆老母問！（老母真係唔係粗口，ok?）係咁催我快啲幫佢最追返新嗰兩個台！

同樣嘅情況，喺我屋企自己老人家身上都有發生。
我幫手追好客廳部電視後後，立刻被催促「追埋房嗰部丫」，雖然佢哋一路睇一路問我點解仲未有節目嘅(4月1日傍晚)，但係個台就一路都停留喺港台電視31台度，再間中轉過去Viu TV又望下。
我忍唔住問：「你真係咁想睇咩？」
阿爸阿媽對眼冇離開過電視答我：「唉，無綫做來做去都係嗰啲，好鬼悶！」

所以就算過往一直都彷彿同獨市經營冇咩分別，無綫喺今年錄得虧損(不計出售台灣生意股權），仲要係1988年上市以來首次錄得虧損，絕對唔係冇原因。由劇集、節目、又或是就算係咁多年來收視最穩定地不錯嘅無綫新聞，都係全線得到越嚟越差嘅評價。

所以你以為兩個新台分別以「重新愛上睇電視」（港台）以及「睇電視最緊要有得揀」，係真係純粹宣傳手法嘅口號？事實係，兩國新台，的確有可能令到更多本身好耐無睇電視嘅年青人，打開返部電視機。亦都令好多本身無得揀睇邊個台嘅老一輩觀眾，從此只會打開31同99台。

港台電視的文代節目又或者諷刺時弊嘅節目，大家相信都唔陌生，繼續穩打穩紮。至於100％新鮮嘅ViuTV，從網絡所見， 第一晚播出熱播韓劇《‪太陽的後裔‬》，又或者網絡上萬眾期待嘅《‪跟住矛盾去旅行‬》，已經有唔少朋友手提同埋評論。之後當新劇《瑪嘉烈與大衛》嘅電視版，同埋一眾名氣弱嘅女藝人拍攝嘅格鬥真人騷《G-1格鬥會》推出之時，舊台取代亞洲電視成為弱勢電視台嘅速度，應該比任何人想像中都更快。

港台電視節目表：
http://programme.rthk.hk/rthk/tv/index.php?c=tv&m=timetabled&channel=dtt31

viuTV節目表：
http://www.viu.tv/epg/99
‬‬
text/ Tyler Li
‬‬