是日噏day：沒自信的人，都有分上下等

有晚同一位萍水相逢嘅朋友對話，我同佢講：「你個人暗地裡，好似冇咩自信。」

朋友：「點解咁講？」

我：「因為有一類冇自信嘅人嘅特徵，你中晒。」

朋友：「咩特徵？」

我：「我留意過，每次當有人講說話讚你，你都唔多敢信。唔係講緊你真係唔信，可能你心底入面，都覺得嗰啲讚美說話係合理嘅，但係你係唔敢去選擇相信。我估可能你心入面係諗：嗰啲可能都只不過係客套說話黎嘅啫——我估你唔想自己發現咗之後失望掛。」

朋友磨蹭咗一陣，答：「其實你都講得中，咁仲有冇其他特徵呢？」

我：「仲有一樣嘢，就係其實你暗地裡，超級在意其他人對你嘅負面批評。你未必會每每都喜怒形於色，俾人發現你喺一大段對話裏面，好在意一兩句就住你能力、表現嘅批評，甚至有時只係一啲好中性嘅只係意見。但係每次呢一兩句說話出現嘅時候，你嘅眼神都係特別留心，同時有啲失落咁款。嗱，就好似而家我同你講呢番說話咁。」

朋友：「哈哈，你都講得啱，咁但係可以點呢？」

我：「其實都無辦法㗎喎，可能你喺你在意嘅範疇上面，慢慢儲多啲經驗， 就會有信心㗎啦。但我反而想講，係無自信呢個範疇入面，你呢種都算係上等人。」

朋友：「點解啊？」

我：「因為你呢類人，通常都非常願意接受意見。有時反而好怕人哋鬧得你唔夠，又或者唔滿意你嘅表現，又收埋唔同你講。咁起碼呢種性格，時間耐左，你都會做得越嚟越好丫。最怕係另外一種自卑友，因為自卑，所以自大。咩都認屎認屁，唔聽人意見，拒絕任何批評，以為自我膨脹就再冇問題。呢類人，除咗本身乞人憎之外，最慘嘅，係佢永遠只會停留喺呢個泥沼般嘅狀態，永遠冇進步。所以，其實長遠睇，你都幾有希望丫。」

朋友：「咁睇嚟，你個人應該好有自信。」

我：「唔係喎，其實我都係咁，所以我先知你諗咩咋嘛。」

text by Tyler Li
(圖片來源：valooto)