是日噏day：砲友會讓女生打錯自己分？

好多閒時會食下散餐嘅女仔，都會錯判自己嘅質素，令佢地真正談戀愛嘅時候出現困難。

向來支持性別平等嘅我，不論男性又或者女性朋友，只要係成年人，對於佢哋食下散餐打下友誼波，我一般都冇咩意見。但係對呢類女仔朋友，我會特別有一個忠告：唔好用你食到嘅仔嘅標準，用嚟估計你自己嘅魅力。

咁講，係因為我見過唔少會食散餐嘅女仔，喺真正擇偶拍拖時會搞到一鑊粥。問題唔係出於個男仔介意佢開放（well⋯⋯因為個男仔根本唔知），係在於女仔錯判咗自己嘅真正質素。

我諗好多人，不論男女，要去理解自己嘅吸引力，除咗檢視自己各方面值幾多分以外，最踏實嘅方法，就係睇下自己能夠吸引到咩質素嘅異性。吸引到30分嘅異性，自己應該就係值30分；吸引到80分嘅異性，自己就係值80分。但獵食世界，會為女士製造假象。

實情係，根據獵食場上男女比例嘅嚴重失衡，想食女嘅狗公數目，長期往往遠高於想食仔嘅狗女數目。所以喺高質狗女數目，不足以提供俾數量太多嘅高質狗公嘅時候，就會發生傳說中「餓起上黎，好又一餐，唔好又一餐」嘅自然界現象，學名名為「狗衝」。就係中低質狗女，會食到高質狗公。

一晚共赴巫山，第朝天光如果有「慌張西望」攝製隊衝入黎扑咪訪問：「如果呢條女做你女朋友又O唔OK呢？」答案都應該離不開係耍手擰頭：「食下就OK，做女朋友就免啦。」

見過唔少有「飲食習慣」嘅女仔朋友，回到現實世界揀男朋友時，往往準則都定得高過自己值得嘅質素。正正係因為，佢哋會覺得「我平時食開嘅質素唔係咁低架喎」，食到嘴刁兼高估咗自己值幾多分。落咗床離開咗獵食世界，就會不甘於同自己質素匹配嘅男仔一齊，喺現實世界做真正拍拖嘅伴侶，長遠就形成咗「高質素嘅人哋又唔揀佢，啱質素嘅佢自己又嫌棄」嘅困局。而冇男朋友嘅苦悶，又會令佢哋更多時會去尋找短暫歡娛，遇到更多「質素通漲」嘅狗公，再強化呢種誤判，惡性循環，如墮泥沼。

所以對呢類女性朋友嘅忠告係——你的砲友如何，你的男友必不如何。食還食，獵食世界嘅供與求，落床後不能作準，醒下啦！

text/ Tyler Li