是日噏day：時不時換人的，還是真友情嗎？

如題所述，好多男人常常唔明白，點解有D女人嘅BFF ( best friend forever）會存在經常換畫呢個現象。

為咗預防女權主義嘅朋友，睇完篇文之後打黎鬧爆我，要鄭重地講，唔係所有女人都係咁樣，有好多確實唔是咁的。但客觀地睇，呢種BBF換畫嘅現象，又確實係冇見過出現係我識嘅男人身上。

咁，何謂BFF換畫呢？

有冇曾經見過一個（或者好多個）女人，係公開場合（即係社交平台），三日唔埋兩日就同一位／一堆BFF一齊去呢度去嗰度。行街睇戲食飯做gym做facial整指甲，去到邊度好似糖黐豆一樣。合照selfie嘅hashtag不難見到「#lunch/dinner_withmyDearestBBChu」；#missmydarlingmuch；#幸好還有你在我身旁……

更甚者，你會見到佢哋買埋同一款衫、同一條裙、同一款手袋、食埋同一碟甜品，姊妹裝咁樣自拍合照，甚至乎一齊去旅行。放閃程度，隨時sweet過蜜運中嘅情侶。（整容整埋同一款樣嘅例子係有，但其實又真係唔算多）

但係非常非常有趣嘅現象係，有時你見到呢類女仔，好奇之下問佢：「咦？你個好姊妹xxx呢？好似好耐冇見你地合照咁嘅？」你會得到一個非常驚嚇嘅答案：「唉。咪再提嗰條八婆，反左面啦，其實我都未見過啲人咁賤格架囉！」

當中反目成仇嘅原因，又或者誰是誰非，都唔重要。因為你好快會見到佢，將呢種連屙屎都就快要合體一齊入埋同一格嘅嫺熟套路，同陸續有來嘅下任「best friend forever」重複演練。直至同再新一任BFF又玩反面，先至會好似寄居蟹咁，再揾過另一個愛的替身。

見過一個BFF會換畫嘅女仔，年頭結婚時成隊姊妹團包括伴娘，其實friend咗都唔夠一年。婚後年尾都未過，呢班所謂「金蘭姊妹」，已經完全係佢fb 消聲匿跡，取而代之一齊去shopping嘅，係另一班全新嘅「BFF」BB豬。

好難想像，第時睇返結婚當日嘅相同影片，呢個女仔究竟會有咩感想——又或者，根本無所謂感想，因為佢本人可能根本無咩感覺。

男人喺兄弟情呢個層面上，同女人係愛情上搵一生一世嘅真愛，本質其實好似。
正如女人會質疑不停轉換對象，根本唔係真愛一樣；男人亦都理解唔到，莫逆之交如果經常換畫，究竟係咩玩法。

唔係話男人嘅友誼，唔會有反面嘅情況，而係男人，就算同一個朋友反面，唔會需要搵過另一個人去取代相同嘅位置。不合則去嗰位，還不合則去嗰位，另外有新朋友合得來，係完全另一段完全獨立嘅友誼，要搵人取代嘅，事情實在太過悲哀。

或者男人（包括女漢子）眼中嘅友誼，從來唔關乎到要炫耀啲咩，唔需要日日selfie扮friend放閃；亦無所謂要時時刻刻stick together，去獲取友情證明書一樣嘅安全感。

就算好耐無見對方，一個電話，揸架車出去傾一晚計，又或者成晚唔講嘢都得。
既然冇所謂張揚冇所謂依賴，淡如水嘅情義，亦無所謂換畫，亦更容易細水長流（對唔住，呢個形容詞係有少少hehe）。

呢個，係點解呢類BFF換畫友情，被人藐視嘅原因，亦係望住呢類「BFF換畫」人種嘅時候，凳佢嘅人生覺得悲哀嘅原因，因為嗰種友誼，太廉價了，算唔上有「真」朋友。

text by Tyler Li (facebook: 泰兄）

（圖片來源：網絡圖片）