曹永廉演公公入型入格 仲有邊位啱做太監？

由黎耀祥、蕭正楠、陳國邦、曹永廉等主演嘅《公公出宮》雖然喺新年期間首播而影響收視，但係劇情輕鬆搞笑，贏得口碑。不過最大嘅亮點都係見到一班男人camp camp地扮太監，而當中扮得最乸形又爆笑嘅曹永廉，更加被推舉做新一代笑匠，連佢嘅拍檔蕭正楠都話驚佢拍完套劇會出櫃。其實每逢有太監或者Camp Camp 地嘅角色都會好吸睛，而曾經完美演繹太監角色嘅仲有以下幾位。

魯振順
魯振順出名擅長飾演乸乸地嘅角色，最出名嘅就係喺1996年《笑傲江湖》入面飾演東方不敗，其後分別喺《秀才愛上兵》、《紫禁驚雷》、《寒山潛龍》等飾演太監角色。不過就算魯振順唔係飾演太監，由於佢把特別嘅聲線，加埋演繹方法，令佢一早被列入「自己人」名單。

蔣志光
對好多90後黎講，可能好多人都係早前聽完《相逢何必曾相識》先發現原來蔣係歌手，而且仲要好唱得。佢喺《男親女愛》入面飾演camp camp地律師做得入型入格，又識做Facial，完全係當時各位女士心目中嘅「姊妹」。佢喺《宮心計》中飾演太監布吉祥同崔尚宫（米雪飾演）之間嘅一段情，亦令觀眾留下深刻印象。

李豪
現時只得27歲嘅李豪2007年就贏得最具人氣香港先生大獎，其後加入無綫藝員訓練班。起初淨係做茄喱啡，例如男妓、酒吧客人、打手、示威人士等等，不過後來終於被人發現到原來佢男生女相，無論飾演變性人、太監、基民等都十分嬌俏可人。當年《變身男女Chok Chok Chok》亦搵咗佢做偽娘造型拍宣傳片，令到好多人「驚艷」。

岳華
雖然岳華嘅演繹唔屬於Camp Camp地，不過當佢要做太監角色嘅時候，佢就會有另一番風味。佢喺《大太監》入面做陳福做到入2012年萬千星輝頒獎典禮最佳男配角最後十強。喺2015年《張保仔》入面又做公公，完全唔使靠Camp都可以做到公公獨特嘅氣派。

王偉樑
王偉樑由1990年初就開始喺無綫拍電視劇，初期都係做變態佬、精神病患者、癮君子等。而佢係1995年電視劇《情濃大地》飾演大包米嘅時候就廣受好評。不過講到呢度，你都未必知係邊個。不過如果我話你知佢就係《尋秦記》入面嘅趙高，你就一定會有印象。佢果種阿諛奉承嘅太監精神真係令人畢生難忘。不過可惜近排有傳言話呢位好戲之人退出幕前，而家去咗幫人剪頭髮。

李國麟
雖然李國麟經常都要飾演奸角，不過佢喺《宮心計》入面飾演掌握大權的太監馬元贄，為人囂張霸道，橫蠻弄權嘅表現就真係令人眼前一亮。李國麟將角色拿揑得宜，簡直人見人憎，令到觀眾邊睇邊鬧。